

Nogironlik faqat kasallik tashxisiga qarab belgilanmaydi. Sog‘liqdagi muammo qancha davom etayotgani va shaxsning kundalik hayotda yordamga ehtiyoji ham hisobga olinadi. Hozirgi kunda nogironlikni belgilash tartibi yanada soddalashtirilmoqda va elektron tarzda o‘tgan. Fuqaro jarayonni boshlash uchun Tibbiy-ijtimoiy ekspert komissiyasiga (TIEK) hujjat ko‘tarib borishi shart emas. Murojaat elektron shaklda yoki yashash joyidagi tegishli xizmatlar orqali berilishi mumkin. Ushbu maqolamizda aynan shu tartibni batafsil tushuntirib beramiz.
Nogironlikni belgilash uchun qayerga murojaat qilish kerak?
Siz quyidagi usullardan biri orqali nogironlik holatingizni belgilash uchun murojaat qilishingiz mumkin:
- Yagona interaktiv davlat xizmatlari portali — my.gov.uz orqali;
- mahalladagi ijtimoiy xodimingiz orqali;
- oilaviy shifokoringiz orqali (har 2 000 aholi soniga bitta oilaviy shifokor belgilangan);
- yashayotgan hududingizda joylashgan “Inson” ijtimoiy xizmatlar markazi orqali.
Ya’ni siz o‘zingizga qulay usulni tanlashingiz mumkin. Masalan, siz oilaviy shifoxonaga borish imkoniyatiga ega emassiz. Shunday vaziyatda siz yashaydigan mahalla ijtimoiy xodimidan nogironlikni belgilashda amaliy yordam so‘rashingiz mumkin. Nogironlikni belgilash uchun arizani ijtimoiy xodimingiz ham kiritib berishi mumkin.
TIEK bu nima?
TIEK — bu Tibbiy-ijtimoiy ekspert komissiyasi (avval TMEK – Tibbiy mehnat ekspert komissiyasi yoki VTEK ruschada Врачебно-трудовая экспертная комиссия deb atalgan).
Bu shaxsga nogironlik belgilash masalasini ko‘rib chiqadigan komissiya. TIEK fuqaroning tibbiy hujjatlari va boshqa zarur ma’lumotlarni ko‘rib chiqib, nogironlik belgilash bo‘yicha xulosa beradi.
Hozirgi kunda TIEK har bir tuman va shaharlardagi «Inson» ijtimoiy xizmatlar markazlari qoshida faoliyat ko‘rsatmoqda.
my.gov.uz orqali qanday murojaat qilinadi?
my.gov.uz portaliga kirib, “Ijtimoiy himoya” bo‘limidan “Nogironlikni belgilash uchun ariza yuborish” xizmatini tanlang.

Ariza topshirishda foydalanuvchi turi va ariza turini belgilashingiz kerak. Agar siz arizani o‘z nomidan topshirayotgan bo‘lsangiz, unda “Arizachi” variantini tanlaysiz. Agar sizni nomingizdan ota-onangiz yoki sizga qarab turuvchi inson arizani topshirayotgan bo’lsa, unda o’sha inson “Vakil” variantini tanlashi kerak.
ariza turi sifatida esa “Nogironlik belgilash” bandi tanlanadi. Ariza turini tanlashda yana boshqa variantlar chiqadi:
- Nogironlik guruhini og‘irlashtirish
- Nogironlik belgilash
- Nogironlik sababini o‘zgartirish
- Nogironlik muddatini o‘zgartirish
- Kasbiy mehnat layoqati yo‘qotilishi darajasini aniqlash (foiz) yoki o‘zgartirish
- 18 yoshgacha nogironligi bo‘lgan bolaga o‘zgalar parvarishiga muhtoj bola deb xulosa berish
O‘zingizni vaziyatingizdan kelib chiqib kerakli variantni tanlang.

Keyingi bosqichda siz o‘zingiz haqingizdagi ma’lumotlarni tekshirasiz va zarur joylarini to‘ldirasi. Jumladan, jismoniy shaxsning shaxsiy identifikatsiya raqamingiz (JShShIR), hudud, tuman yoki shahar, mahalla, oilaviy poliklinika, yashash manzili va telefon raqamingiz ko‘rsatiladi.
Barcha ma’lumotlarni kiritganingizdan so‘ng, ularni yana bir bor tekshirishingiz kerak. Agar xato bo‘lsa, oldingi bosqichga qaytib tuzatishingiz mumkin. Ma’lumotlar to‘g‘ri bo‘lsa, “Yuborish” tugmasi bosing.
Eslatma! Arizani elektron raqamli imzo bilan tasdiqlash talab etilmaydi. Murojaatni qabul qilish va ko‘rib chiqish bepul.
Arizangiz yuborilgandan keyin nima bo‘ladi?
Siz oilaviy poliklinikaga borganingizda o‘zingiz bilan quyidagi hujjatlarni olib borishingiz kerak:
- shaxsini tasdiqlovchi hujjat;
- ilgari nogironlik belgilangan bo‘lsa, nogironlikni tasdiqlovchi ma’lumotnoma;
- mavjud bo‘lsa, oldingi davolanish, tekshiruv va tashxislarga oid tibbiy hujjatlar.
Bu hujjatlar shifokorga sizningiz sog‘lig‘ingiz holatini to‘liqroq baholashga yordam beradi. Arizangiz oilaviy shifokor yoki tegishli tibbiyot muassasasi tomonidan ko‘rib chiqiladi. Oilaviy shifokor sizning tibbiy hujjatlaringizni batafsil o‘rganib chiqadi. Kerak bo‘lsa, qo‘shimcha tekshiruv yoki davolanish belgilaydi. Murojaat natijasi bo‘yicha arizangiz qabul qilingan kundan boshlab 15 ish kuni ichida javob yuboriladi.
Avval sizga davolanishi kerak bo‘lsa, belgilangan davolanish muddatini o‘tishingiz kerak bo‘ladi. Davolanishdan keyin ham organizmingiz faoliyatidagi buzilish saqlanib qolsa, hujjatlar rasmiylashtirilib, 10 ish kuni ichida TIEKga yuboriladi. Oilaviy shifokoringiz elektron tarzda TIEKga yuborilgan hujjatlarda xato-kamchiliklar topilsa, TIEK tomonidan qaytarilishi mumkin.
Eslatma! 2025-yil 1-sentyabrdan boshlab TIEKda ko‘rikdan o‘tkazishga yuborish uchun zarur bo‘lgan davolanish muddatlari bo‘yicha talab bekor qilingan. Avval insonning holatidan qat’iy nazar kamida 120 kun ichida shifoxonada davolanmasa TIEKga yuborish mumkin emas edi. Endilikda har bir kasallikning kechishi va turiga qarab davolanish muddatini alohida belgilanadi. Ammo haliyam insonning holatiga qarab, 30 kun, 60 kun, 90 kun va 120 kun davolanishi belgilangan holatlar ham bor.
Shuningdek, TIEKning kasb, sport va ta’lim bo‘yicha tavsiyalar berishi bekor qilingan. TIEKning quyidagi funksiyalari ham tugatilgan:
- Vaqtincha mehnatga layoqatsizlik varaqasi muddatini uzaytirish;
- Maxsus jihozlangan transport vositasini boshqarishga yaroqlilikni aniqlash;
- Xaydovchilik guvohnomasini olish uchun tibbiy xulosa berish.
Ushbu funksiyalar davlat tibbiyot muassasalariga o‘tkazilgan.
TIEKga hujjatlarni o‘zingiz olib borishingiz shartmi?
TIEKga kerakli hujjatlarni o‘zingiz yig‘ib olib borishingiz shart emas. Hujjatlaringiz oilaviy poliklinikada rasmiylashtiriladi va oilaviy shifokor tomonidan elektron tarzda tegishli tuman (shahar) yoki tumanlararo TIEKga yuboriladi. TIEKga oilaviy shifokor quyidagi hujjatlarni yuboradi:
- tibbiyot muassasasining yo‘llanmasi;
- ambulator kartadan ko‘chirma;
- mavjud bo‘lsa, kasallik tarixidan ko‘chirma;
- zarur hollarda boshqa asoslovchi hujjatlar.
Bu tartib sizning sog‘lig‘ingiz holatiga qarab farq qilishi mumkin. Agar nogironlik belgilari aniq ko‘rinib turgan bo‘lsa, qo‘shimcha tibbiy tekshiruvlar talab qilinmaydi va hujjatlar 5 ish kuni ichida TIEKga yuboriladi. Bunday holatlarga, masalan, quyidagilar kiradi:
- qo‘l yoki oyoqning ayrim qismlari amputatsiya qilinganligi;
- bir yoki har ikki ko‘zning to‘liq ko‘rligi;
- bolalikdan karlik va kar-soqovlik;
- Daun sindromi;
- og‘ir harakat buzilishlari bilan kechadigan bolalar miya falaji kabi holatlar.
Eslatma! Agar fuqaroning nogironlik belgilari aniq ko‘rinib turgan bo‘lsa, uning TIEKga shaxsan borishi talab etilmaydi. Bunday holatda nogironlik tibbiy hujjatlar asosida sirtdan belgilanadi.
Agar nogironlik sirtdan belgilanmasa, siz TIEK ko‘rigidan o‘tishingiz kerak bo‘ladi. TIEK hujjatlaringizni qabul qilgach, sizga ko‘rik o‘tkaziladigan joy, vaqt va sana haqida 3 ish kuni ichida xabar beradi. Ko‘rik hujjatlar TIEK tomonidan qabul qilingan kundan boshlab 20 kalendar kun ichida o‘tkazilishi kerak.
Siz TIEK ko‘rigiga borganda pasportingiz yoki shaxsingizni tasdiqlovchi boshqa hujjatini ko‘rsatishingiz kerak. Tibbiy hujjatlarni esa siz o‘zi olib bormaysiz — chunki ularni oilaviy shifokor elektron shaklda TIEKga yuborgan bo‘ladi.
Agar hujjatlaringizda qaysidir kamchiliklar bo‘lsa va shubha tug‘ilsa, TIEK qo‘shimcha tekshiruvlarga yuborishi mumkin. Shuningdek, masalan sizning hujjatlaringizni birlamchi tuman TIEK ko‘rib chiqsa, sizga birdan xulosa chiqmaydi. Sababi hujjatlaringizni random (tasodifiy tarzda) asosida boshqa hududdagi viloat TIEKlargi kelib tushadi va qo‘shimcha o‘rganishga beriladi. Agar bunday tekshiruvdan so‘ng, hujjatlarda xatolik topilsa birlamchi TIEKga qaytariladi va kamchiliklarni bartaraf qilishga tavsiyalar beriladi.
«Inson» ijtimoiy xizmatlar markazida sizni yana qanday baholashadi?
2025 yil 1-sentyabrdan boshlab tumanlararo va tuman (shahar) TIEKlari tomonidan faqat tibbiy hujjatlar asosida nogironlikni belgilash bekor qilingan. Nogironlik sizning sog‘lig‘ingiz holati va funksionalligini baholash natijalaridan kelib chiqib elektron tarzda belgilanadi.
Shaxslarning kundalik hayotdagi faolligi va ishtiroki – funksionallik deb ataladi. “Inson” markazi xodimlari kundalik hayotingizdagi imkoniyatlar va qiyinchiliklarni (funksionallikni) maxsus so‘rovnoma yordamida baholashadi.
«Inson» markazining ijtimoiy xodimlari Jahon sog‘liqni saqlash tashkiloti (JSST) andozalari asosida sizning kundalik hayotdagi imkoniyatlaringizni (qanchalik mustaqil harakatlana olishingiz, muloqot qilishingiz, o‘z-o‘zingizga xizmat ko‘rsata olishingiz, mehnat faoliyati bilan shug‘ullanish qobiliyatingiz va boshqalarni) baholaydi.
Misol uchun ko‘rishida yoki jismoniy nogironligi bo‘lgan shaxs qay darajada o‘z yo‘lini mustaqil topa oladi? Qay darajada o‘z-o‘ziga xizmat ko‘rsata oladi? Mana shu mezonlar uning nogironlik holatini aniqlashda muhim jarayon bo‘lib xizmat qiladi.
Eslatma! Agar siz sogʻligʻiningiz holatiga koʻra “Inson” markazlariga borolmasangiz, sogʻligʻiningiz holati va funksionallikni baholash uyingizda yoki davolanishda boʻlgan statsionarda oʻtkaziladi.
Nogironlik belgilangandan keyin nima bo‘ladi?
Agar siz nogironligi bo‘lgan shaxs deb topilsangiz, sizga nogironlik guruhi beriladi. 18 yoshdan katta shaxslarga I, II yoki III guruh nogironligi belgilanishi mumkin.
- I guruh — sog‘liqdagi o‘zgarish organizm faoliyatiga juda katta darajada ta’sir qilganda;
- II guruh — sog‘liqdagi o‘zgarish organizm faoliyatiga sezilarli darajada ta’sir qilganda;
- III guruh — sog‘liqdagi o‘zgarish organizm faoliyatiga o‘rtacha darajada ta’sir qilganda belgilanadi.
Shuningdek, yakka tartibdagi reabilitatsiya dasturingiz elektron shaklda tuziladi. Dastur TIEK xulosasi qabul qilingan kundan boshlab 10 ish kuni ichida shakllantiriladi.
Nogironlikni belgilash jarayonidagi kerakli ma’lumotlar “Yagona milliy ijtimoiy himoya” axborot tizimiga elektron shaklda kiritiladi. Unda sizning sog‘lig‘ingiz haqidagi ma’lumotlar asosida quyidagilar kiritiladi:
- nogironlik muddati va sababi;
- qanday reabilitatsiya choralari kerakligi;
- reabilitatsiya vositalariga ehtiyoj;
- TIEK ko‘rigiga yuborish muddati.
Nogironlik qancha muddatga belgilanadi?
18 yoshdan katta shaxslarga nogironlik 6 oy, 1 yil, 2 yil yoki 5 yil muddatga belgilanishi mumkin. Aniq muddat sizning sog‘liq holatingiz, kasallikning kechishi va belgilangan mezonlarga qarab TIEK tomonidan belgilanadi.
Ayrim hollarda nogironlik qayta ko‘rikdan o‘tish muddati belgilanmasdan, ya’ni muddatsiz belgilanadi. Nogironlik belgilari aniq ko‘rinib turgan ayrim holatlarda, shuningdek organizmdagi o‘zgarishlarni qaytarish imkoni bo‘lmasa, reabilitatsiya natija bermasa hamda sog‘liq holati va ijtimoiy moslashuvni yaxshilash imkoni bo‘lmasa, qonunchilikda belgilangan holatlar bo‘yicha nogironlik muddatsiz belgilanishi mumkin. 69ta kasalliklar ro‘yxati shakllantirilgan va faqat shu kasalliklari bor insonlarga muddatsiz nogironlik guruhi beriladi.
Eslatma! Chernobil AES halokati oqibatlari bilan bog‘liq I va II guruh nogironligi ham muddatsiz belgilanadi. Nogironlikning III guruhida 5 yil muddatga belgilanadi. Nogironlikning sababi “CHAES dagi halokat oqibatida kelib chiqqan” deb koʻrsatiladi”
Agar nogironlik ma’lum muddatga belgilangan bo‘lsa, siz qayta ko‘rikdan o‘tishingiz kerak bo‘ladi. TIEK qayta ko‘rik o‘tkaziladigan sanadan bir oy oldin sizni bu haqida xabardor qilishi kerak. Oilaviy shifokor va tibbiyot muassasasi sizning qayta ko‘rik muddatingiz o‘tib ketmasdan TIEKga yuborilishini hamda tibbiy hujjatlar to‘g‘ri rasmiylashtirilishini ta’minlashi kerak.
Agar siz uzrli sababsiz qayta ko‘rikka kelmasangiz, unga ko‘rik sanasi, vaqti va joyi ko‘rsatilgan holda yana bir marta xabar beriladi. Siz takroran ham uzrli sababsiz kelmasa, bu nogironlik bo‘yicha pensiya yoki nafaqa to‘lovini to‘xtatib qo‘yish uchun asos bo‘ladi.
TIEK xulosasidan norozi bo‘lsangiz, nima qilish mumkin?
Agar siz tuman (shahar) yoki tumanlararo TIEK xulosasidan norozi bo‘lsangiz, xulosa berilgan kundan boshlab 30 kalendar kun ichida Qoraqalpog‘iston Respublikasi, viloyat yoki Toshkent shahar TIEKga maxsus dastur orqali norozilik arizasini kiritishingiz mumkin. Agar bu arizani o‘zingiz kiritolmasangiz, mahallangizdagi ijtimoiy xodim yoki oilaviy shifokoringizdan arizani kirgizib berishda yordam so‘rashingiz mumkin.
Eslatma! Agar TIEK xulosasi yuzasidan shikoyat va arizalarni boshqa platformalar orqali yuborsangiz (masalan, prokurorga, hokimga, Ijtimoiy himoya milliy agentligi rahbariyatiga yoki agentlik call-markaziga, yoki Prezident virtual qabulxonasi (portalga)), siz vaqtingizni ketkazib norozilik arizasini kiritish muddatini o‘tkazib yuborasiz. Agar TIEK maxsus dasturidan ariza kiritilmasa, uni ko‘rib chiqib bo‘lmaydi va muddati ham o‘tib ketish ehtimoli katta bo‘ladi.
Viloyat TIEKiga norozilik arizangiz tushgandan keyin 20 kalendar kun ichida sizni qayta ko‘rikdan o‘tkazadi. Agar siz hududiy TIEK xulosasidan ham norozi bo‘lsangiz, xulosa qabul qilingan sanadan keyin 5 kun ichida Respublika TIEKga elektron dastur orqali shikoyat qilishingiz mumkin.
Agar Respublika TIEK xulosasidan ham norozi bo‘lsangiz, belgilangan tartibda sudga murojaat qilishingiz mumkin.
Nogironlikni belgilash uchun pul to‘lanadimi?
TIEKda fuqarolarni ko‘rikdan o‘tkazish bepul. Zarur hollarda TIEK tomonidan belgilangan davlat tibbiyot muassasalarida o‘tkaziladigan qo‘shimcha tekshiruvlar ham bepul amalga oshiriladi.
Eslatma! Agar nogironlikni belgilash jarayonida siz korrupsiya holatlariga duch kelsangiz va sizdan oilaviy shifokor yoki TIEK xodimlari pul talab qilishsa, korrupsiyaga oid xabar va murojaatlaringizni 71/239-59-66 raqamli ishonch telefoni, @Ihma_anticor_bot Telegram boti va ihma.uz rasmiy saytida anonim xabar qoldirish oynasi orqali yuborishingiz mumkin.
Oʻzbekiston Respublikasi Korrupsiyaga qarshi kurashish agentligining qisqa raqamli bepul Call-markazi – 1253. Yoki to‘g‘ridan-to‘g‘ri huquqni muhofaza qilish organlariga ham murojaat qilishingiz mumkin.
Ijtimoiy himoya milliy agentligida korrupsiyaga qarshi kurashish, davlat mablagʻlaridan toʻgʻri foydalanish va ijtimoiy yordamlar taqsimotining shaffofligini taʼminlash maqsadida alohida profilaktika va nazorat tizimi (komplaens-nazorat) joriy etilgan.
Nogironlikni rasmiylashtirish bo‘yicha yashash hududingizdagi “Inson” ijtimoiy xizmatlar markaziga murojaat qilishingiz mumkin. Shuningdek, 1140 ishonch telefoni orqali ham maslahat olishingiz mumkin (Ishonch telefoni dushanbadan jumagacha soat 09:00 dan 18:00 gacha ishlaydi).
Foydalanilgan manbalar:
- O‘zbekiston Respublikasi Vazirlar Mahkamasining 2022-yil 8-fevraldagi 62-son “Tibbiy-ijtimoiy ekspertiza xizmati tashkiliy tuzilmasini va faoliyatini tashkil etishga oid normativ-huquqiy hujjatlarni tasdiqlash to‘g‘risida”gi qarori, 9-ilova bilan tasdiqlangan “Fuqarolarni tibbiy-ijtimoiy ekspert komissiyalarida ko‘rikdan o‘tkazish tartibi to‘g‘risida”gi Nizom hamda tegishli ilovalari. https://lex.uz/ru/docs/-5852486#-5853923
- O‘zbekiston Respublikasi Prezidentining 2024-yil 16-iyuldagi PQ-257-son “Nogironlikni belgilash tizimini takomillashtirish bo‘yicha qo‘shimcha chora-tadbirlar to‘g‘risida”gi qarori, xususan 2-bandning “v¹” kichik bandi. https://lex.uz/uz/docs/-7021644
- Oʻzbekiston Respublikasi Vazirlar Mahkamasining 2025-yil 16-sentyabrdagi 587-son “Nogironlikni belgilash tizimi raqamlashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida”gi qarori. https://lex.uz/uz/docs/-7730821
- O‘zbekiston Respublikasi Yagona interaktiv davlat xizmatlari portali, “Nogironlikni belgilash uchun ariza yuborish” davlat xizmati. https://my.gov.uz/uz
- O‘zbekiston Respublikasi Prezidenti huzuridagi Ijtimoiy himoya milliy agentligining rasmiy veb-sayti va “Inson” ijtimoiy xizmatlar markazlari bo‘yicha ma’lumotlar. https://my.ihma.uz/contact-us
Muallif: Aziz Abdullayev
Muharrir: Dilmurod Yusupov
Bu maqolada sen kattalarda nogironlik holatini belgilash tartibi haqida bilib olasan.
Prezidentning 257-sonli qaroriga ko‘ra:
- sen zarur bo‘lmagan payt davolanishing
- sendan nogironlik hujjatingni so‘rash bekor qilindi.
Masalan:
- Yoshi katta inson sog‘ligi sabab oilaviy shifokorga bora olmadi.
- Mahalladagi shifokor yoshi katta insonning nogironlik holatini jahon sog‘liqni saqlash tashkiloti tartibi bo‘yicha tekshiradi.
- Yoshi katta nogironligi bor insonlar sarson bo‘lmasligi uchun bu tizim ishlab chiqildi.
Jahon sog‘liqni saqlash tashkiloti – bu dunyodagi hamma insonlar sog‘ligini himoya qiladigan tashkilot.
Bu tizim 2024-yil 1-sentyabrdan:
- Toshkent shahri va Navoiy viloyatida sinovdan o‘tkaziladi.
- 2025-yil 1-sentyabrgacha boshqa viloyatlarda ham tashkil qilinadi.
Yoshi katta insonga nogironlik belgilash uchun:
- gov.uz internet tizimi orqali telefondan
- yoki oilaviy shifokorga borib murojaat qilish kerak.
- (Ariza namunasi 1-ilovada)
Bosh shifokor yoshi katta insonning nogironlik holatini o‘rganib, arizani shifokorlar guruhiga yuboradi.
Arizaga qo‘shib nogironlik belgilari va oqibatlari haqidagi hujjatlar yuboriladi.
Shifokorlar guruhi oilaviy shifokorni tibbiy xulosasiga qarab yoshi katta insonga nogironlik belgilaydi.
Agar yoshi katta nogironligi bor inson sog‘ligi sabab oilaviy shifoxonaga bora olmasa, arizani mahalladagi maxsus ishchiga ham berishi mumkin.
Maxsus ishchi yoshi katta insonning arizasini oilaviy shifoxonaga olib boradi.
Tekshiruvdan o‘tkazish uchun yoshi katta insonning hujjatlarini oilaviy shifokor shifokorlar guruhiga yuboradi.
18 yosh va undan katta insonlarning nogironlik holatini “Inson” ijtimoiy xizmatlar markazi baholaydi.
Agar yoshi katta inson sog‘ligi sababli “Inson” markazlariga bora olmasa, uni uyda yoki davolanayotgan joyda tekshiruvdan o‘tkaziladi.
Nogironlikni baholash tartibi:
- Insonning hayoti davomida o‘z-o‘ziga xizmat qilishi
- Yurish, yo‘lni topish, gaplashish, o‘z harakatini boshqarishi
- Mehnat faoliyati imkoniyatini to‘la yoki qisman yo‘qotishi.
Masalan, ko‘rish bo‘yicha nogironligi bor inson:
- qanchalik o‘z yo‘lini mustaqil topa olishi
- qay darajada o‘z-o‘ziga xizmat qilishi nogironlik holatini aniqlashda yordam beradi.
Jismoniy nogironligi bor inson:
- qay darajada o‘z-o‘ziga xizmat qila olishi
- mustaqil harakatlana olish holatlari darajasi
- uning nogironlik holatini aniqlashda yordam beradi.
2025-yil 1-apreldan kattalarda nogironlik belgilashda aniq ko‘rsatiladigan ma’lumotlar:
- nogironlik vaqti va sabablari
- insonga kerakli bo‘lgan davolash tartibi
- protez buyumlari va davolovchi texnik jihozlarga ehtiyoji.
2025 yil 1-sentyabrdan boshlab:
- tuman (shahar) shifokorlar guruhi qog‘oz ko‘rinishidagi nogironlik hujjatini berishi bekor qilinadi.
Sening sog‘liging tekshiriladi va natijaga qarab kompyuter orqali nogironlik belgilanadi.
Assalomu alaykum, meni oʻgʻlim 3 yoshida koʻzidan onkologik kasallik boʻlib, bir koʻzini operatsiya qilishdi.Hozir bir koʻzi protez. Lekin 18 ga kirganda uning 2-guruh nogironligi 3-guruhga tushirildi..Shu toʻgʻrimi.Hozir 20 yoshda.
Vaalaykum assalom, hurmatli fuqaro! Afsuski, biz bu qaror to‘g‘ri yoki noto‘g‘ri ekanligini aytolmaymiz, chunki bu masala Tibbiy ijtimoiy ekspert komissiyasi (TIEK) vakolatida. Agar siz o‘g‘lingizga berilgan TIEK xulosasi bilan rozi bo‘lmasangiz, uni bekor qilib bo‘lmaydi degani emas. Qonunchilik xulosa ustidan shikoyat qilish va qayta ko‘rikdan o‘tish huquqini beradi. Asosiysi, muddatlarni o‘tkazib yubormaslik va hujjatlarni to‘g‘ri tayyorlash.
TIEK xulosasi berilgan kundan boshlab 30 kalendar kun ichida viloyat TIEKga maxsus dastur orqali norozilik arizasini kiritishingiz mumkin. Agar bu arizani o‘zingiz kiritolmasangiz, mahallangizdagi ijtimoiy xodim yoki oilaviy shifokoringizdan arizani kirgizib berishda yordam so‘rashingiz mumkin.
Bu tartib mazkur maqolamizda ham batafsil yoritilgan. Iltimos qayta tanishib chiqing:
👉 https://huquqplus.uz/materials/tibbiy-xizmatlar-va-reabilitasiya/2966#toc-tiek-xulosasidan-norozi-bo-lsangiz-n