
Uchinchi guruh nogironligi bor shaxslarga qanday imtiyozlar bor?
- Matnli format
- Video format
- Oson matn

O‘zbekistonda nogironligi bo‘lgan shaxslarga imtiyozlar asosan I va II guruh nogironlar uchun mavjud. Ammo III guruhdagi nogironligi bo‘lgan shaxslar uchun qanday imtiyozlar va imkoniyatlar bor? Ushbu maqola orqali ular uchun turli xil sohalarda mavjud ayrim imtiyozlar haqida bilib olasiz.
Ijtimoiy himoya milliy agentligi taqdim qilgan rasmiy ma’lumotga ko‘ra 2026-yil 1-yanvar O‘zbekistonda 1 060 111 nafar nogironligi boʻlgan shaxslar davlat ro‘yxatidan o‘tgan. Ularning 82 405 nafarini – III guruh nogironligi bor shaxslar tashkil qiladi.
III guruh nogironlik darajasi odatda yengilroq nogironlik holatiga ega shaxslarga nisbatan belgilanadi. Shuning uchun ayrim imtiyozlar va ijtimoiy to‘lovlar (masalan, bolalikdan nogironlik nafaqasi, nogironlik pensiyasi, daromad solig‘idan, mol-mulk va yer solig‘idan imtiyozlar, oliy ta’lim muassasalaridagi davlat grantlari) asosan I va II guruh yoki bolalikdan nogironlar uchun mo‘ljallangan.
Qanday holatlarda III guruh nogironligi tayinlanadi?
Nogironlik, mehnatga layoqatlilik darajasiga qarab I, II va III guruhlarga bo‘linadi. III guruh nogironligi – mehnat qilish qobiliyatini qisman yo‘qotgan shaxslarga belgilanadi.
III-guruh nogironlik mezonlariga quyidagilar kiradi:
- Organ yoki tizimning fuksional bizilishi bor;
- Sog’liqdagi buzilishlar doimiy tibbiy nazoratni talab qilmaslik;
- Og’ir surunkali kasalliklar yengil yoki o’rta darajada namoyon bo’ladi (masalan, gipertoniya II boshqichi, qandli diabet);
- Yurak-qon tomir tizimining o’rta darajadagi buzilishi (masalan, yurak yetishmovchiligining I-II bosqichi);
- Tirsak yoki tizza bo’g’imlarida harakat chegaralangan, biroq yurish mumkin;
- Nevrologik kasalliklarning yengil ko’rinishlari (masalan, yengil falaj holatlari, surunkali radikulit, yengil aqliy sustlik).
- gipertoniya kasalligining 2-3 bosqichi;
- infarktdan keyingi koronar yetishmovchilik;
- o‘rtacha og‘irlikdagi qandli diabet;
- kompensatsiyalangan bosqichdagi jigar sirrozi;
- insult yoki bosh miya jarohatining o‘rtacha oqibatlari;
- ish qobiliyati saqlangan holda 1-2 bosqichli onkopatologiya.
II guruh va III guruh nogironliklarining farqi nimada?
II va III guruh nogironliklarini bir-biridan farqlashda asosiy mezon – bu sog‘liqning buzilish darajasi va uning shaxsning kundalik hayotiga ta’siridir. II guruh nogironligini belgilash uchun organizm funksiyalarining turg‘un va sezilarli darajada (70-80% atrofida) buzilishi asos bo‘ladi. Bunday buzilishlar shaxsning o‘z-o‘ziga to‘liq xizmat qilishiga, mustaqil harakatlanishiga yoki to‘laqonli mehnat faoliyati yuritishiga jiddiy to‘sqinlik qiladi va uni boshqalarning yordamiga muhtoj qilib qo‘yadi.
Aksincha, III guruh nogironligi organizm funksiyalari mo’tadil darajada cheklanganda belgilanadi. Bu nogironlikning eng yengil darajasi bo‘lib, bunda inson o‘ziga bemalol xizmat qila oladi, biroq sog‘lig‘i tufayli o‘z kasbi bo‘yicha ishlashda yoki avvalgi ishini bajarishda qiyinchiliklarga duch kelishi mumkin, bu esa unga yengilroq mehnat sharoitlarini talab qiladi.
Hayotiy misol: «Aslida menga II guruh berilishi kerak edi, lekin Tibbiy-ijtimoiy ekspertiza komissiyasi menga III guruh berdi. Bunday vaziyatda nima qilsam bo‘ladi?»
Agar fuqaro tuman (shahar) yoki tumanlararo Tibbiy-ijtimoiy ekspertiza komissiyasi qaroridan norozi bo‘lsa, quyidagi tartibda shikoyat qilish huquqiga ega:
- Birlamchi shikoyat – Tuman/shahar yoki tumanlararo TIEK qaroridan norozi fuqaro 1 oy ichida Qoraqalpog‘iston Respublikasi, viloyatlar yoki Toshkent shahar TIEKga murojaat qiladi. Ariza tushganidan keyin hududiy TIEK 20 kun ichida ariza beruvchini qayta ko‘rikdan o‘tkazadi va xulosani “Tibbiy-ijtimoiy ekspertiza” elektron axborot tizimida rasmiylashtiradi.
- Xolis komissiya – Agar fuqaroga yoki vrach-ekspertga hududiy TIEK xulosasi ma’qul bo‘lmasa, xolis vrach-ekspertlardan iborat komissiya qarorni qayta ko‘rib chiqadi. Xulosa o‘zgartirilgan taqdirda, nogironlik to‘g‘risidagi ma’lumotnoma qayta rasmiylashtiriladi.
- Ijtimoiy himoya milliy agentligiga shikoyat – Hududiy TIEK qaroridan norozi fuqaro 30 kun ichida Agentlikka murojaat qilishi mumkin. Agentlik 1 oy ichida qarorni qayta ko‘rib chiqadi. Zarurat tug‘ilsa, Agentlik tomonidan xolis vrach-ekspertlardan iborat Maxsus komissiya tuziladi va TIEK xulosasi nazorat tartibida qayta o‘rganiladi. Maxsus komissiya avvalgi qarorni o‘zgartirsa, tegishli hududiy TIEK tomonidan yangidan nogironlik ma’lumotnomasi rasmiylashtiriladi.
- Sud tartibi – Fuqarolar barcha bosqichlardagi qarorlardan norozi bo‘lgan taqdirda, qonunchilikda belgilangan tartibda sudga murojaat qilish huquqiga ega.
Fuqarolar Ijtimoiy himoya milliy agentligining 1140 va 1146 ishonch raqamlari orqali oʻz savol va takliflarini Agentlikka bersalar boʻladi. Shuningdek, ariza, shikoyat va iltimoslarni «Jismoniy va yuridik shaxslarning murojaatlari to‘g‘risida»gi Qonun talablariga asosan yuborsangiz boʻladi.
Ariza yoki shikoyat xatlarida quyidagilar bo‘lishi lozim:
- F.I.Sh.;
- manzil;
- masalaning tushunarli va qisqacha mazmuni;
- telefon raqamingiz (bog‘lanish uchun).
Murojaatlaringizni quyidagi manzilga yuborsangiz boʻladi: O‘zbekiston, Toshkent sh, Mirobod tumani, Yangizamon ko‘chasi, 1-uy. Telefonlar: (0371) – 239-59-22, (0371) – 202-06-00, (0371) – 239-59-23
E-mail: info@ihma.uz; ihma@exat.uz
III guruhdagi nogironligi bo‘lgan shaxslar uchun nogironlik nafaqasi to‘lanadimi?
Vazirlar Mahkamasining 252-sonli qarori bilan tasdiqlangan “Davlat pensiyalarini tayinlash va to‘lash tartibi to‘g‘risida”gi Nizomga muvofiq (ushbu qaror hozirgi kunda amalda emas, 20.09.2023 yil o‘z kuchini yoqotgan), 2011-yil 1-yanvardan boshlab nogironlikning III guruhi belgilangan shaxslarga nogironlik pensiyasi tayinlanmaydi va to‘lanmaydi. Shuningdek, takroriy tibbiy ko‘rikdan o‘tkazilgandan so‘ng nogironlikning III guruhi belgilangan shaxslarga ham pensiya tayinlanmaydi va toʻlash toʻxtatiladi.
Eslatma! «Fuqarolarning davlat pensiya ta’minoti to‘g‘risida»gi Qonuni 15-moddasiga muvofiq, faqatgina Chernobil AESdagi avariya tufayli mayib bo‘lish yoki kasallik oqibatida III guruh nogironligini orttirgan shaxslargagina nogironlik pensiyalari tayinlanadi. Ular nogironlik pensiyasini olishni davom ettirishadi. Chernobil AES falokati oqibatida nogiron deb topilganlarga I va II guruh nogironligi muddatsiz, III guruh esa 5 yil muddatga beriladi. Sabab sifatida “CHAES falokati oqibatida” deb yoziladi.
20 yoshga toʻlgunga qadar umumiy kasallik tufayli ish davrida yoki ishlash toʻxtatilganidan keyin nogironligi boʻlgan shaxs deb topilgan fuqarolarga tayinlanadigan pensiya turlari ham mavjud. Masalan, shaxs 20 yoshga toʻlgach umumiy kasallik tufayli nogironlik paydo boʻldi. Bunday hollarda fuqarolarga pensiyalar mavjud ish stajidan qatʻi nazar tayinlanadi.

Nogironligi boʻlgan shaxslarning pensiya olishga boʻlgan huquqi haqida batafsil huquqiy maqolamizda oʻqing.
III guruh nogironlik belgilangan shaxs pensiya yoshiga yetganda yoshga doir pensiya olish huquqiga ega. Agar nogironlik pensiyasini olayotgan Chernobil AESdagi avariya tufayli III guruh nogironligi bor shaxslar yoshga doir pensiya yoshiga yetgan bo‘lsa, ushbu fuqarolar faqat bir turdagi pensiyani tanlash huquqiga ega. Sababi, nogironlik pensiyasi va yoshga doir pensiya bir vaqtning o‘zida to‘lanmaydi. Qaysi pensiya miqdori yuqori bo‘lsa, fuqaro o‘sha turdagi pensiya turini tanlashi mumkin.
Ta’lim olishda III guruh nogironligi bor shaxslarga imtiyozlar bormi?
III guruh nogironligi (shuningdek, II guruh) bor o‘quvchilar maxsus maktab-internatlardan inklyuziv tartibdagi umumta’lim maktablariga o‘tkazilishi mumkin. Bu imkoniyat I guruh nogironligi bo‘lgan bolalarga tatbiq etilmaydi. Masalan, mutlaqo ko‘ra olmaydigan yoki tayanch-harakat tizimidagi og‘ir buzilishlar sababli umuman yura olmaydigan I guruh nogiron o‘quvchilar inklyuziv ta’limga jalb qilinmaydi.
Bilim va malakalarni baholash agentligi taqdim qilgan ma’lumotga ko‘ra, III guruh nogironligi bor abituriyentlar oliy ta’lim muassasalarining bakalavriatiga o‘qishga kirishda test sinovi uchun to‘lovdan ozod etiladi.
Eslatma! III guruh nogironligi bo‘lgan abituriyentlarga nisbatan nogironligi bo‘lgan abituriyentlarning oliy ta’lim muassasalariga kirishlari uchun belgilangan 2% kvota imtiyozi qo‘llanilmaydi.
III guruh nogironligi bor shaxslarga mehnat qilishda qanday imtiyozlar bor?
Vazirlar Mahkamasining 2022-yil 31-avgustdagi 486-son qarori 3-ilovasiga muvofiq, III guruh nogironligi bo‘lgan shaxslar uchun faoliyat yuritishi mumkin bo‘lgan kasblar va lavozimlar ro‘yxati hamda mehnat sharoitlari bo‘yicha tavsiyalar mavjud. Masalan, qon aylanish tizimi yoki boshqa somatik kasalliklar oqibatida III guruh (ba’zan II guruh) nogironligi bo‘lgan shaxslar, TIEK tavsiyasiga ko‘ra, mehnat faoliyati uchun tegishli tashkilotlarga yuboriladi.
O‘zbekiston Respublikasining Mehnat kodeksidagi qisqartirilgan ish vaqti davomiyligi, uzaytirilgan mehnat ta’tili va boshqa imtiyozlar faqatgina I va II guruh nogironligi bo‘lgan shaxslarga nisbatan qo‘llaniladi. 1941 — 1945-yillardagi urush qatnashchilariga va imtiyozlari bo‘yicha ularga tenglashtirilgan boshqa shaxslarga Mehnat kodeksining 227 va 228-moddalariga muvofiq birinchi hamda ikkinchi va keyingi ish yillari uchun har yilgi mehnat ta’tilini berish tartibi belgilangan. Shuningdek, bunday toifadagi shaxslarga Mehnat kodeksining 242-moddasida xodimning talabiga ko‘ra majburiy tartibda ish haqi saqlanmagan holda ta’til berish ko‘zda tutilgan.
III guruh nogironligi bor shaxslar uchun transportdan foydalanishda imtiyozlar bormi?
III guruh nogironligi bor shaxslar jamoat transportida (avtobus, tramvay, trolleybus, metropoliten, yo‘nalishli va yo‘nalishsiz taksilar) bepul yurish huquqiga ega emas. Qonunchilikka ko‘ra bepul foydalanish huquqi faqat quyidagi toifadagi shaxslarga berilgan:
- 1941—1945 yillardagi urush nogironlari va urushning I guruh nogironiga hamrohlik qiluvchi shaxslar;
- Nogironligi bo‘lgan ko‘zi ojiz shaxslar va ularga safarlarda hamrohlik qiluvchi shaxslar;
- O‘zgalar parvarishiga muhtoj bo‘lgan yolg‘iz keksalar, yolg‘iz yashovchi keksalar va nogironligi bo‘lgan shaxslar.
Urush oqibatida III guruh nogironligi bo‘lgan shaxslarga yiliga bir marotaba poyezd chiptasidan 50% chegirma beriladi (borish va kelish uchun) taqdim etilgan guvohnoma asosida.
Ulug‘ Vatan urushi nogironlari va qatnashchilari, Chernobil AES avariyasini bartaraf etishda ishtirok etgan shaxslar, shuningdek, ularga tenglashtirilgan III guruh nogironligi bor shaxslar uchun «Uzbekistan Airways» AJ qatnovlarida yil davomida imtiyozlar qo‘llaniladi:
- agar ular UVU 3-guruh nogironi guvohnomasi va ikki dona havo transporti taloniga (joriy va oldingi yoki joriy va keyingi yil uchun) ega bo‘lsa, 100% chegirma asosida bepul uchishlari mumkin;
- faqat joriy yil uchun berilgan bitta talon asosida 50% chegirma bilan aviachiptadan foydalanish huquqiga ega.
Xulosa qilib aytganda, III guruh nogironlari yil davomida ikkita talon bilan bepul, bitta talon bilan esa yarim narxda aviachiptadan foydalanishlari mumkin.
Foydalanilgan manbalar:
- «Davlat pensiyalarini tayinlash va to‘lash tartibini yanada takomillashtirishga yo‘naltirilgan normativ-huquqiy hujjatlarni tasdiqlash to‘g‘risida»gi O‘zbekiston Respublikasi Vazirlar Mahkamasining 08.09.2011 yildagi 252-son qarori. https://lex.uz/docs/-1865473?ONDATE=16.02.2018#-1865481
- «Fuqarolarning davlat pensiya ta’minoti to‘g‘risida»gi O‘zbekiston Respublikasining Qonuni, 03.09.1993 yildagi 938-XII-son, https://lex.uz/ru/docs/-112314#-126992
- “Jismoniy va yuridik shaxslarning murojaatlari to‘g‘risida”gi O‘zbekiston Respublikasi qonuniga o‘zgartish va qo‘shimchalar kiritish haqidagi O‘zbekiston Respublikasining Qonuni, 11.09.2017 yildagi O‘RQ-445-son, https://lex.uz/docs/-3336169#-3336174
- «Tibbiy-ijtimoiy ekspertiza xizmati tashkiliy tuzilmasini va faoliyatini tashkil etishga oid normativ-huquqiy hujjatlarni tasdiqlash to‘g‘risida»gi O‘zbekiston Respublikasi Vazirlar Mahkamasining 08.02.2022 yildagi 62-son qarori, https://lex.uz/ru/docs/-5852486#-5852901
- «Nogironlikni belgilash tizimini takomillashtirish boʻyicha qoʻshimcha chora-tadbirlar toʻgʻrisida»gi O‘zbekiston Respublikasi Prezidentining Qarorining 2024-yil 16-iyuldagi 257-son qonuni https://lex.uz/docs/-7021644
- «Nogironligi bo‘lgan abituriyentlarga beriladigan imtiyozlar» O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligi, 2022-yil 9-iyun, https://uzbmb.uz/post/view/nogironligi-bo-lgan-abituriyentlarga-beriladigan-imtiyozlar
- «Davlat pensiyalarini tayinlash va to‘lash tartibi to‘g‘risidagi nizomni tasdiqlash haqida» O‘zbekiston Respublikasi Vazirlar Mahkamasining 13.10.2022 yildagi 592-son qarori, https://lex.uz/ru/docs/-6236060#-6236607
- «Nogironligi bo‘lgan shaxslarning mehnat faoliyatini amalga oshirishi uchun qulay shart-sharoitlar yaratish chora-tadbirlari to‘g‘risida»gi O‘zbekiston Respublikasi Vazirlar Mahkamasining 31.08.2022 yildagi 486-son qarori, https://lex.uz/uz/docs/-6179643#-6180150
3-гурух ногиронлигидан 2-гурух ногиронлигига утган ишловчи ногиронларни 2-гурух ногиронлигига утгандан кейин пенсияни кайта хисо китоб этишда 3-гурухлигида ишлаган Иш стажи инобатга олинса яхши буларди.
Men hozirda.2 guruh nogironligim bor koʻzi ojizlar maxsus internat maktabida 20 yildan beri ishlayman shu yili sinflar soni qisqarganligini vaj qilib mening ish soatimni qisqartirib tashladi shu toʻğrimi
Assalomu alaykum,
Iltimos, telefon orqali +998 (90) 358-50-60 raqamiga telefon qiling. Yuristimiz sizdagi holatni batafsil o’rganishi lozim.
Assalomu aleykum yaxshimiszlar men 3 guruh nogironiman 2 farzandni onasi 2 guruhdan 3 guruhga tuwirib tawadi 1ta buyragimni olib tawagan xozirda yana aperatsiyaga yozib berdi qora talogʻimda kista oʻsayabdi ekan menga biron bir imtiyoz bormi gruppamni koʻtarib beriwsa boʻlmaydimi bu 3 aperatsiyam ayol bolwim bn juda qiynalyabman boʻlmasa 3 guruhlarga ham oz miqdorda pul ajratiwsa boʻlmidimi
Vaalaykum assalom, agar siz tuman (shahar) yoki tumanlararo Tibbiy-ijtimoiy ekspertiza komissiyasi (TIEK) qaroridan norozi bo‘lsangiz, ushbu maqolamizda yozilgan tartibda shikoyat qilish huquqiga egasiz. Birlamchi shikoyatni tuman/shahar yoki tumanlararo TIEK qaroridan norozi fuqaro 1 oy ichida kiritishingiz kerak bo‘ladi. Iltimos maqolamiz bilan qayta tanishib chiqing.
Afsuski, «Fuqarolarning davlat pensiya ta’minoti to‘g‘risida»gi Qonuni 15-moddasiga muvofiq, faqatgina Chernobil AESdagi avariya tufayli mayib bo‘lish yoki kasallik oqibatida III guruh nogironligini orttirgan shaxslargagina nogironlik pensiyalari tayinlanadi.
Assalomu – alaykum. Bullyoz epidermoliz uchun 18 yoshdan keyin 3-guruh berishdi. Aslida u kasallik asorati 2- guruhga toʻgʻri keladi.
Nega 3-guruh berishyapti. Viloyatdan ham shunday javob kelsa Respublikaga chiqish kerakmi?
Vaalaykum assalom! Tuman TIEK qaroridan norozi bo‘lsangiz, 1 oy ichida Viloyat TIEKga (20 kunda ko‘rib chiqadi), uning xulosasidan qoniqmasangiz, 30 kun ichida Ijtimoiy himoya milliy agentligiga (1 oyda ko‘rib chiqadi) shikoyat qilishingiz mumkin. Agar barcha bosqichlardagi qarorlardan norozi bo‘lsangiz, sudga murojaat qilish huquqiga egasiz. Ushbu maqolamizda shikoyat bilan murojaat qilish tartibi haqida batafsil ma’lumot berganmiz. Iltimos yaxshilab tanishib chiqing.
Shuningdek, O‘zbekistonda bullyoz epidermoliz tashxisi bor «Kapalak-bolalarga» bepul malakali yordam ko‘rsatuvchi O‘zbekistondagi yagona Nodavlat Notijorat Tashkilotiga murojaat qilishni ham tavsiya qilamiz. Ularning Instagram sahifasi: https://www.instagram.com/kapalakbolalar_uz/ Telegram orqali murojaat qilish uchun: https://t.me/kapalakbolalar_uz
Salomat bo‘ling!
Assalomu alaykum mening oʻgʻlimning bir koʻzida toʻr parda koʻchishi oqibatida surunkali katarakta tashxizi qoʻyildi bu koʻz umuman koʻrmaydi ikkinshi koʻzda miopiyaning engil darajasi 3 grux berishgan shu adolatdanmi
Vaalaykum assalom! Tibbiy ijtimoiy ekspert komissiyasi (TIEK) vakili shunday javob berdi:
«Ko‘z kasalligi yaxshi ko‘radigan ko‘zning o‘tkirligiga qarab belgilanadi. 0,09 dan baland bo‘lsa 3 guruh belgilanadi. Ushbu bemorning ko‘rish o‘tkirligini yuborsin-chi ko‘ramiz. Shunga qarab aytaman.»
Hududingizda joylashgan «Inson» ijtimoiy xizmatlar markazida qoshida faoliyat yuritadi TIEK komissiyalari. Nogironlikni belgilashda barcha maslahatni berishga ularning vakolati bor. Agar siz tuman (shahar) yoki tumanlararo TIEK qaroridan norozi bo‘lsangiz, belgilangan tartibda shikoyat qilish huquqiga egasiz. Birlamchi shikoyat tuman/shahar yoki tumanlararo TIEK qaroridan norozi fuqaro 1 oy ichida Qoraqalpog‘iston Respublikasi, viloyatlar yoki Toshkent shahar TIEKga murojaat qilishi kerak.
Nogironlikni belgilash bo‘yicha qolgan savollaringizni mutaxassisning oʻzlariga quyidagi telefonlar orqali berishingiz mumkin.
☎️ Tel: +998 (90) 176-79-21 (Umarali Nazarmatov)
📞Call-markazi qisqa raqami: 1140
Assalomu alaykum yaxshimisiz sizdan bir maslahat kerak edi . Men maktabda oʻqituvchi boʻlib ishlayman 22 yillik stajim bor dekretdagi stajlaram qushiladimi stajga kiyin meni qulim eshitmagandi past ovozni umuman eshitmayabdi . 42 yoshga kirganman shu yoshimda nogironlik pensiyasini chiqsam boʻladimi ishlashga juda qiynalayabman javob uchun oldindan kattakon rahmat
Vaalaykum assalom. O‘qituvchilik kasbi doimiy muloqotni talab qilgani uchun eshitish qobiliyati pasayishi ishlashda jiddiy qiyinchilik tug‘dirishi qiyin masala albatta. «Fuqarolarning davlat pensiya ta’minoti to‘g‘risida»gi Qonunning 37-moddasiga muvofiq bola parvarishlash ta’tillarida bo‘lish vaqti (dekret) umumiy ish stajiga qo‘shiladi.
Pensiya hisoblash uchun ish stajiga bola parvarishlash ta’tillarining jami ko‘pi bilan 6 yillik davri kiritiladi (ilgari bu 3 yil edi, keyinchalik o‘zgartirish kiritilib 6 yilgacha uzaytirildi). Demak, sizning 22 yillik stajingiz ichidagi dekret davrlari (agar ular jami 6 yildan oshmasa) to‘liq staj sifatida hisobga olinadi.
Nogironlik pensiyasiga chiqishingiz uchun siz birinchi navbatda nogironlik holatini Tibbiy-ijtimoiy ekspert komissiyalari ko‘rigidan o‘tishingiz kerak bo‘ladi. Buning uchun siz hududingizda joylashgan «Inson» ijtimoiy xizmatlar markaziga murojaat qilishingiz kerak bo‘ladi. Batafsilroq ma’lumotni «Kattalarda nogironlik holatini belgilash tartibi qanday?» mavzusidagi huquqiy maqolamizda tanishib chiqsangiz bo‘ladi: https://huquqplus.uz/materials/tibbiy-xizmatlar-va-reabilitasiya/2966
Ijtimoiy himoya milliy agentligining “1140” va (71) 202-06-00 ishonch telefoni orqali murojaat qiling.
Assalomu allekim yaxshimisz 15 yoshimda chap buyrakimni olib tashlashgan boshida 1 yil keyin 2 yilga 2 guruh berishdi 18 yoshga kirganimda 3 guruhga tushirib qoyishdi Lekin Qolgan Ong Buyrakim xam kasal bolishiga Qaramay Gidranefroz 2-3 daraja UZI xulosalaridayam MSKT dayam Gidranefroz 2-3 daraja deb berilgan 5 marotaba shu boyicha davolanganman Kreatinin 390.8 Machevina 17.8 Surunkali buyrak yetishmovchiligi 3 daraja Asorati sifatida yurak yetishmovchiligi 2- daraja bolishiga Qaramay menga 3 guruh berishdi bu xaqlimi 3 Guruhga Toshkentga davolangani order yoq ekan shundey ekan 3 guruh kasalikni olib tashlagan maqul emasmi Respublika miqyosida davolana olmasa
Vaalaykum assalom! Savolingiz uchun rahmat. Hozirgi vaqtda agar 18 yoshgacha bo‘lsangiz, sizga nogironligi bo‘lgan bola deb nogironlik guruhi belgilanadi. Agar 18 yoshdan oshgan bo‘lsangiz, I, II yoki III nogironlik guruhi belgilanadi. Sizda agarda kassalik asoratlari kuchaygan bo‘lsa, o‘zingiz yashash joyingizdagi poliklinikada to‘liq ko‘rikdan o‘tishingiz kerak bo‘ladi. Oilaviy shifokorga murojaat qilasiz, agar kasallik asoratlar ko‘paygan bo‘lsa, sizni hujjatingizni elektron shakllantirib Tibbiy-ijtimoiy ekspert komissiyasi (TIEK)ga yuboradi. Keyin sizga SMS xabar kelib tushadi va nogironlik holatini belgilash uchun sizni chaqirishadi. Agar haqiqatdan ham asoratlaringiz standartlar bo‘yicha to‘g‘ri kelsa.
Ikkinchi savolingiz bo‘yicha, viloyat/respublika tibbiyot muassasalariga Vazirlar mahkamasining 2017-yil 5-sentyabrdagi 696-sonli qarori (Manba: https://lex.uz/ru/docs/-3333284) va 2025-yil 4-noyabrdagi 694-sonli Vazirlar Mahkamasining qarori (Manba: https://www.lex.uz/uz/docs/-7813256) asosida o‘zingiz yashab turgan poliklinikaga murojaat qilsangiz, tibbiy-maslahat komissiyasi ko‘rib va o‘rganib chiqib agar Toshkent shahrida istiqomat qilsangiz, shaharda, agar respublika miqyosida bo‘lsa masalan urologiya markaziga hujjatlar yuboriladi. Agar lozim deb topsa order asosida yo‘naltiradi. Agar yo‘q, bizni urologiya markazimizda davolanishga tibbiy ko‘rsatmasi yo‘q deb topilsa, tuman/shahar tibbiyot muassasalarida davolanishingiz kerak deb topilsa, o‘sha muassasada davolanishga to‘g‘ri keladi.
Agar siz tuman (shahar) yoki tumanlararo TIEK qaroridan norozi bo‘lsangiz, belgilangan tartibda shikoyat qilish huquqiga egasiz. Birlamchi shikoyat tuman/shahar yoki tumanlararo TIEK qaroridan norozi fuqaro 1 oy ichida Qoraqalpog‘iston Respublikasi, viloyatlar yoki Toshkent shahar TIEKga murojaat qilishi kerak. Nogironlikni belgilash bo‘yicha qolgan savollaringizni mutaxassisning oʻzlariga quyidagi telefonlar orqali berishingiz mumkin. Ijtimoiy himoya milliy agentligining “1140” va (71) 202-06-00 ishonch telefoni orqali murojaat qiling.
Assalomu alaykum menga ham 3 gurux nogronligi belgilanganda TIEK dan norozi bo’lib chiqdim Kamissiya vrachlari qayta ko’rib chiqildi Bo’ldi SMS boradi deyishuvdi Bugun 5 chi kun Qancha vaqtda belfilanishi kerak o’zi Raxmaat
Vaalaykum assalom, Ozoda! Agar siz tuman (shahar) yoki tumanlararo TIEK qaroridan norozi bo‘lsangiz, belgilangan tartibda shikoyat qilish huquqiga egasiz. Birlamchi shikoyat tuman/shahar yoki tumanlararo TIEK qaroridan norozi fuqaro 1 oy ichida Qoraqalpog‘iston Respublikasi, viloyatlar yoki Toshkent shahar TIEKga murojaat qilishi kerak.
Nogironlikni belgilash bo‘yicha qolgan savollaringizni mutaxassisning oʻzlariga quyidagi telefonlar orqali berishingiz mumkin. Ijtimoiy himoya milliy agentligining “1140” va (71) 202-06-00 ishonch telefoni orqali murojaat qiling.
Astıma 4 pogona garmonga muhtoj doimiy ingalyator ishlatadi 25 da yoshim yoshligimdan astimam bor surunkali nechinchi güruh berishi kerak uzi 3 güruh bersa agar qanaqa imtiyazları bor
Assalomu alaykum, biz bu masala bo‘yicha aniq ma’lumot berolmaymiz chunki Tibbiy ijtimoiy ekspert komissiyasi (TIEK) vakolatida nogironlik holatini belgilash. Shu sababli, hududingizda joylashgan «Inson» ijtimoiy xizmatlar markazlari qoshida faoliyat yuritadigan TIEK komissiyasiga murojaat qilishni tavsiya qilamiz. Ijtimoiy himoya milliy agentligining “1140” va (71) 202-06-00 ishonch telefoni orqali ma’lumot olsangiz bo‘ladi.
Shuningdek, kattalarda nogironlik holatini belgilash tartibi haqida boshqa huquqiy maqolamiz orqali yanada batafsilroq ma’lumot oslangiz bo’ladi: https://huquqplus.uz/materials/tibbiy-xizmatlar-va-reabilitasiya/2966
Uchinchi guruh nogironligi bor shaxslarga imtiyozlar haqida ushbu maqolamizda batafsil ma’lumot berib o‘tganmiz. Iltimos, tanishib chiqing: https://huquqplus.uz/materials/social-protection/7769
Ассалому алайкум яахшимисиз мен Азамат шаропов болаликдан ногирон тугма менга унг сон чанок бугуми чикиши тугма неортироз Билан боглик унг оек мучаси 5 6см калта юрганда огрик бор мен газли шахри согликни саклаш БОШЛИГИГА ариза бердим менга балнични булмаса 120кун ногиролик чикорадими деди лекин мен 2008болаликдан ногирон малумотнома бор хаккатдан хам Азамат шаропов учунчи группа ногирон иштимойий таминот булимига рухатда туради деган 2015йил ногиролик тухтатилган давлат томонидан мен2025кайта тикламокчи булдим хужжатларим тугри хаммаси лекин балнични керак дийди мен болаликдан ногирон тугма булсам олдин ногиронлик пенсия олганман балнични нимага керак менга
Assalomu alaykum! Hozirgi kunda fuqarolarga nogironlik belgilash uchun hujjatlari oilaviy shifokorlar tomonidan Tibbiy-ijtimoiy ekspert komissiyasiga (TIEKga) yuboriladi. Buning uchun fuqaro yashash joyidagi oilaviy shifokoriga uchrashadi. Ular tomondan ko‘rib chiqib tegishli hujjatlari va obyektiv ahvoli ko‘rib chiqiladi va TIEKga yuborish uchun nogironlik belgilari borligi yoki holatida salbiy o‘zgarishlar borligi bo‘lsa, keyin TIEKga yuboriladi.
Agar siz tuman (shahar) yoki tumanlararo TIEK qaroridan norozi bo‘lsangiz, belgilangan tartibda shikoyat qilish huquqiga egasiz. Birlamchi shikoyat tuman/shahar yoki tumanlararo TIEK qaroridan norozi fuqaro 1 oy ichida Qoraqalpog‘iston Respublikasi, viloyatlar yoki Toshkent shahar TIEKga murojaat qilishi kerak. Nogironlikni belgilash bo‘yicha qolgan savollaringizni mutaxassisning oʻzlariga quyidagi telefonlar orqali berishingiz mumkin. Ijtimoiy himoya milliy agentligining “1140” va (71) 202-06-00 ishonch telefoni orqali murojaat qiling.