
Bola puli va kam ta’minlangan oilalarga nafaqalar to‘lash tartibi qanday?
- Matnli format
- Video format
- Oson matn

Muallif: Imomali Tuyev
Muharrir: Nasiba Atamuratova
Illyustratsiya: Alina Olimova
Illyustratsiyaga tifloizoh: 5000 so‘mlik qog‘ozli pulni ustida ona va uning o‘g‘li choy ishishyapti. Yashil rangdagi yorug‘ xonada stolni ustida paxta gulli choynak va likopchani ustida ikki bo‘lak non ustida saryog‘ surilgan. Tepada 100 so‘mlik tanga ham tasvirlangan.
Bugungi kunda mamlakatimizda aholining yordamga muhtoj bo’lgan qatlamini qo’llab-quvvatlashga alohida e’tibor berilmoqda. Ushbu maqsadda ularga turli xil moddiy ko’maklar berilib, ularning turmush tarzini yaxshilash uchun harakatlar amalga oshirilmoqda. Bu boradagi ijtimoiy munosabatlar O’zbekiston Respublikasi Prezidentining 2021-yil 11-avgustdagi PF-6277-son farmoni bilan tartibga solingan.
Bolani parvarish qilish nafaqasi – oilalarga bola 2 yoshga to’lgunicha ularni parvarish qilish uchun beriladi.
Bolalar nafaqasi (xalq tilida «bola puli») – bola parvarishi nafaqasi o’rniga kam ta’minlangan oilalar farzandlari uchun beriladigan nafaqa.
Kam ta’minlangan oila – oilaning har bir a’zosiga jami bir oylik o‘rtacha daromad minimal iste’mol xarajatlari miqdoridan oshmagan oila.
Moddiy yordam – bolalari yo’q yoki barcha bolalari 18 yoshdan katta bo‘lgan oilalarga va yolg‘iz fuqarolarga to‘lanadi. U 6 oy muddatga tayinlanadi.
Bolalar nafaqasini tayinlashda nimalarga e’tibor beriladi?
- Oiladagi 14 yoshdan 18 yoshgacha bo’lgan bolalar;
- Bolalar soni;
- Oilaning kam ta’minlangan deb e’tirof etilishi.
Nafaqa 6 oydan 12 oygacha tayinlanishi mumkin. Lekin, agarda oilaning eng kichik yoxud yagona bolasi 18 yoshga to‘lgan bo‘lsa, nafaqa oyning oxirigacha to‘lanadi.
Masalan, sizning eng kichik farzandingiz noyabr oyida 18 yoshga to’ladi. Siz esa ushbu farzand uchun bola nafaqasini olayapsiz. Uning to’lanishi noyabr oyida bolangizning 18 ga kirishi bilan to’xtatiladi.
O‘zbekiston Respublikasi Vazirlar Mahkamasining 21.10.2021 yildagi 654-son qaroriga muvofiq, oilaning har bir a’zosiga to‘g‘ri keladigan jami 1 oylik o‘rtacha daromad miqdori minimal iste’mol xarajatlari miqdoridan oshmasa, oila kam ta’minlangan deb e’tirof etiladi. Ya’ni, oilangizning rasmiy daromadi oila a’zolaringiz soniga bo‘linganida kishi boshiga 715 ming so‘mdan oshmasa, demak oilangiz kam ta’minlangan oila hisoblanadi.
2026-yildan boshlab hisoblangan minimal iste’mol xarajatlari qiymati bir oyda kishi boshiga 715 ming so‘mni tashkil etdi.
Oilaning bir a’zosiga to‘g‘ri keladigan bir oylik o‘rtacha jami daromadni hisoblab chiqishning misoli:
Masalan: 4 kishidan iborat oilaning a’zosi moddiy yordam olish uchun 2023-yil dekabr oyida murojaat etgan. Uning daromadlari avgust — oktyabr oylari uchun hisoblanadi. Oila a’zolarining barcha daromadlari yig‘indisi (normativ daromadlarni hisobga olgan holda) 7 650 000 so‘mni tashkil etadi. Oilaning bir a’zosiga to‘g‘ri keladigan bir oylik o‘rtacha jami daromadi quyidagini tashkil etadi: 7 650 000 so‘m / 4 kishi / 3 oy — 637 500 so‘m. Bu oilaning har bir a’zosiga 637 500 so‘mdan to‘g‘ri kelyapti. Bu esa belgilangan minimal iste’mol xarajati miqdori 715 000 so‘mdan kam degani.
Eslatma! Bir oylik o‘rtacha jami daromad miqdorini hisoblab chiqishda oila a’zolarining quyidagi nogironlik nafaqasi va pensiyalari rasmiy daromad sifatida hisoblanadi:
- 18 yoshdan katta bolalikdan nogironligi bo‘lgan shaxslarga nafaqa;
- nogironligi bo‘lgan 18 yoshgacha bolalar va OIV infeksiyasiga chalingan 18 yoshgacha bo‘lgan shaxslarga nafaqa;
- o‘zgalar parvarishiga muhtoj nogironligi bo‘lgan 18 yoshgacha bolaning qonuniy vakiliga to‘lanadigan parvarishlash nafaqasi;
- nogironlik bo‘yicha nafaqa;
- nogironlik bo‘yicha nafaqa summasi doirasidagi nogironlik pensiyasi (nogironlik pensiya miqdoridan zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqa miqdori chegirib tashlanadi);
- O‘zbekiston Respublikasi Vazirlar Mahkamasining 21.10.2021 yildagi 654-sonli qarorining 23-moddasida ko‘rsatilgan boshqa turdagi nafaqa va pensiyalar.
Oilani kam ta’minlangan deb e’tirof etish, ularga bolalar nafaqasi va moddiy yordamni tayinlash va to‘lash to‘g‘risidagi qarorlar “Yagona reyestr” ATda shakllantiriladi va qabul qilinadi.
“Ijtimoiy himoya yagona reyestri” axborot tizimi — idoralararo elektron o‘zaro hamkorlikni qo‘llagan holda kam ta’minlangan oilalarni aniqlash, ularga bolalar nafaqasi va moddiy yordam tayinlash hamda davlat tomonidan ko‘rsatiladigan ijtimoiy xizmatlar va yordamni olish uchun murojaat qiluvchilar va oluvchilar to‘g‘risida yagona ma’lumotlar bazasini shakllantirish amalga oshiriladigan avtomatlashtirilgan axborot tizimi.
Bolalar nafaqasining miqdori qancha?
Bolalar nafaqasining har oylik miqdori:
- 360 000 so‘m — yoshi 3 yoshgacha bo‘lgan bir nafar kichik farzand uchun;
- 275 000 so‘m — 3 yoshdan 18 yoshgacha bo‘lgan bir nafar farzand uchun;
- 165 000 so‘m — oilaning ikkinchi farzandi uchun qo‘shimcha;
- 110 000 so‘mdan — oilaning uchinchi va undan keyingi har bir farzandi uchun.
Kam ta’minlangan oilalar uchun moddiy yordamning oylik miqdori – 420 000 so‘m.
Arizani qanday topshirsa bo‘ladi?
Yuqoridagi yordamni olish uchun shaxslar o’zining doimiy yoki vaqtincha yashash hududidagi mahalla fuqarolar yig’iniga murojaat qilshi kerak. Siz ularga arizani yozma shaklda olib borishingiz kerak.
Arizaga quyidagilar ilova qilinadi:
- Ariza beruvchi va oila a’zolarining pasporti yoki ID-kartalari;
- Vasiylik va homiylik organi qarorining nusxasi. (Agarda bola vasiylik ostida bo’lsa);
- Oilaning mavjud uy hayvonlari, transportlari haqida ma’lumot. Agarda ushbu vositalar uning nomiga rasmiylashtirilmagan bo’lsa, unda belgilangan tartibdagi ma’lumotnoma to’ldiriladi.
- Ariza beruvchi yoki oila a’zolari nomiga so’nggi 3 oy ichida o’tkazilgan pul mablag’lari, hisobvaraq qoldiqlari haqida ma’lumotnoma.
2024-yil may oyidan boshlab Bolalar nafaqasi va moddiy yordam tayinlashga onlayn ariza berish imkoniyati paydo bo‘ldi. Onlayn arizani Yagona interaktiv davlat xizmatlari portali my.gov.uz orqali berish mumkin va bu xizmatdan foydalanish bepul.
Talabgorlar ushbu onlayn xizmatdan foydalanish uchun:
- my.gov.uz da ro‘yxatdan o‘tishi;
- tegishli xizmatni tanlashi;
- undagi so‘rovnomani to‘ldirishi va yuborishi kerak.
Quyidagi video orqali onlayn ariza topshirish haqida batafsil ma’lumot olsangiz bo‘ladi.
Ariza “Ijtimoiy himoya yagona reyestri” axborot tizimi tomonidan o‘rganib chiqiladi. Bunda ariza beruvchi oilasining har bir aʼzosiga to‘g‘ri keladigan daromad miqdori aniqlanadi va belgilangan mezonlarga mosligi solishtiriladi.
Shundan so‘ng, ijtimoiy nafaqani tayinlash yoki tayinlashni rad etish to‘g‘risida qaror qabul qilinadi. Ariza javobi my.gov.uz orqali yuboriladi. Mazkur xizmat O‘zbekiston Respublikasi Prezidenti huzuridagi Ijtimoiy himoya milliy agentligi tomonidan koʻrsatiladi.
Qanday holatlarda bola puli va moddiy yordam rad etilishi mumkin?
Oilani kam ta’minlangan deb e’tirof etish va unga tegishli ravishda bolalar nafaqasi yoki moddiy yordamni tayinlashni rad etish holatlari O‘zbekiston Respublikasi Vazirlar Mahkamasining 21.10.2021 yildagi 654-sonli qarorining 4-bob “Bolalar nafaqasi yoki moddiy yordam olish uchun arizalarni ko‘rib chiqish tartibi”, 20-moddasida ko‘rsatib o‘tilgan.
Bunda, nogironligi bo‘lgan shaxslar va ularning oila a’zolari quyidagi holatlarga e’tibor berishlari kerak.
Oila a’zosi I yoki II guruh va 18 yoshgacha bolalikdan nogiron bo‘lsa:
- 7 yildan oshmagan, texnik holati soz bo‘lgan yengil avtotransport vositasi o‘z nomiga rasmiylashtirilgan bo‘lsa,
- ariza beruvchi yoki uning oila a’zolari foydalanuvida bo‘lgan,
- yoxud ishonchnomaga asosan quyidagilar mavjud bo‘lganda rad etilishi mumkin.
Agar oilada:
- bola uch yoshga to‘lguniga qadar parvarish qilayotgan ona bo’lsa (ularning o‘rnini bosuvchi shaxslar);
- ta’lim muassasalarida o‘qiyotganlar bo’lsa (ta’limning kechki va sirtqi shakllari bundan mustasno);
- ishlamaydigan pensionerlar, davlat pensiyasi tayinlash uchun zarur ish stajiga ega bo‘lmagan shaxslarga va mehnatga layoqatsizlik yuzasidan nafaqa oluvchi fuqarolar bo‘lsa;
- OIV infeksiyasiga chalingan shaxslar bo‘lsa;
- I yoki II guruh va bolalikdan nogironligi bo‘lgan 18 yoshgacha shaxslar bo‘lsa;
- to‘rt va undan ortiq o‘n sakkiz yoshga to‘lmagan farzandi mavjud bo‘lgan oilaning mehnatga layoqatli har bir a’zosiga nisbatan. (Bunda 2024-yil 16-maydan boshlab taqdim etilgan arizalar bo‘yicha arizachi yoki oila a’zosi I yoki II guruh va 18 yoshgacha bolalikdan nogiron oila a’zosi bo‘lganda ushbu qoida qo‘llaniladi);
- ruhiy kasalliklar bo‘yicha dispanser hisobida turgan oila a’zolariga nisbatan.
Ulardan rasmiy daromad manbasiga ega bo‘lish, oxirgi 6 oy mobaynida ish izlab kambag‘allikni qisqartirish va bandlikka ko‘maklashish organlariga murojaat qilish hamda bu organlar hisobida turish talabi qo‘yilmaydi. Shuningdek, o‘zini o‘zi band qilgan shaxslar ro‘yxatiga kiritilishi yoki haq to‘lanadigan jamoat ishlari ishtirokchisi hisoblanmagan mehnatga layoqatli oila a’zosi mavjud bo‘lsa ham tepada ko‘rsatilgan toifalarga qo‘llanilmaydi.
Foydalanilgan manbalar:
- O‘zbekiston Respublikasi Prezidentining 11.08.2021-yildagi PF-6277-sonli «Kam ta’minlangan oilalarga moddiy yordam ko‘rsatish hamda kambag‘allik bilan kurashish ko‘lamini yanada kengaytirish chora-tadbirlari to‘g‘risida»gi Qarori, https://lex.uz/docs/-5572509
- O‘zbekiston Respublikasi Vazirlar Mahkamasining 21.10.2021 yildagi 654-sonli «Aholini ijtimoiy himoya qilish tizimini yanada takomillashtirish chora-tadbirlari to‘g‘risida»gi qarori, https://lex.uz/docs/-5688101
- Kam ta’minlangan oilalarga bolalar nafaqasi va moddiy yordam tayinlashga ariza berish, https://my.gov.uz/oz/service/1017
Assalomu alaykum! Men 2-guruh nogironiman. Yolg’iz onaman. 1 nafar farzandim bor. Ota-onam vafot etishgan. Sirtqi ta’limda o’qiyman ya’ni 4-kurs talabaman. O’qituvchiman, bolalikdan nogironlik nafaqasini olaman. Savolim shuki, menga bola puli umuman to’lanmagan.
Assalomu alaykum
Quyidagi raqam orqali biz bilan bog‘laning, sizga huquqiy yordam beramiz.
Telefon raqam: +998 (55) 500-50-60 (3 raqamini bosing)
Bolalar nafaqasi qanday tarzda javob boladi
Ijtimoiy nafaqani tayinlash yoki tayinlashni rad etish to‘g‘risida qaror qabul qilinadi. Ariza javobi my.gov.uz orqali yuboriladi. Mazkur xizmat O‘zbekiston Respublikasi Prezidenti huzuridagi Ijtimoiy himoya milliy agentligi tomonidan koʻrsatiladi.
Assalomu alekum men 31 oktyabrda topshirgan arizamni er xoton ishsiz deb rad etilganini aytishdi va men turmush ortogimni badlikka band qildirdik yana ariza bersak rad etildi.
Assalomu alaykum
Sizda nogironlik holati mavjudmi? 1 va 2-guruh nogironligi bo‘lgan shaxslarga bandlikdan ro‘yxatdan o‘tkazish talab etilmaydi.
Agarda sizda yoki sizning oila a’zolaringizning birida 7 yildan oshmagan, texnik holati soz bo‘lgan yengil avtotransport vositasi bo‘lsa, unda ariza rad etilishi mumkin. Shuningdek bola pulini olish uchun oila kam ta’minlangan deb e’tirof etilishi lozim.
2024-yilning may oyidan hisoblangan minimal iste’mol xarajatlari qiymati bir oyda kishi boshiga 648 ming so‘mni tashkil etdi.
Oilaning bir a’zosiga to‘g‘ri keladigan bir oylik o‘rtacha jami daromadni hisoblab chiqishning misoli:
Masalan: 4 kishidan iborat oilaning a’zosi moddiy yordam olish uchun 2023-yil dekabr oyida murojaat etgan. Uning daromadlari avgust — oktyabr oylari uchun hisoblanadi. Oila a’zolarining barcha daromadlari yig‘indisi (normativ daromadlarni hisobga olgan holda) 7 650 000 so‘mni tashkil etadi. Oilaning bir a’zosiga to‘g‘ri keladigan bir oylik o‘rtacha jami daromadi quyidagini tashkil etadi: 7 650 000 so‘m / 4 kishi / 3 oy — 637 500 so‘m. Bu oilaning har bir a’zosiga 637 500 so‘mdan to‘g‘ri kelyapti. Bu esa belgilangan minimal iste’mol xarajati miqdori 648 000 so‘mdan kam degani.
Mening mashinam bor Damas ishlab chiqarilganiga 8-yildan oshdi mening oilamga bola puli nafaqasi chiqadimi?
Assalomu alaykum
Sizga telefon orqali bog‘lanildi.
Men va erim ishsiz. 1 nafar 7 yosh farzandim bor. Nogironlik belgilangan. Bola puli yoki moddiy yordamga ariza topshirsam ishsizlik sabab rad etildi deyishdi. Oʻzi aslida berilishi kerakni
Assalomu alaykum
Bizga telefon raqamingizni qoldira olasizmi? Siz bilan yuristlarimiz bog‘lanishadi.
Assalomu alaykum! Agar oilangizda bolalikdan nogironligi bo‘lgan 18 yoshgacha shaxs bo‘lsa (sizni vaziyatingizda 7 yoshlik farzandingiz bor ekan), unda sizdan rasmiy daromad manbasiga ega bo‘lish, oxirgi 6 oy mobaynida ish izlab kambag‘allikni qisqartirish va bandlikka ko‘maklashish organlariga murojaat qilish hamda bu organlar hisobida turish talabi qo‘yilmaydi.
Asos: O‘zbekiston Respublikasi Vazirlar Mahkamasining 21.10.2021 yildagi 654-sonli qarorining 4-bob “Bolalar nafaqasi yoki moddiy yordam olish uchun arizalarni ko‘rib chiqish tartibi”, 20-moddasi.
Sizga ushbu masalaga amaliy yechim topish uchun, bepul huquqiy maslahat olish uchun koll-markazimizga: +998 (55) 500-50-60 (3 raqamini bosing) yoki Telegram botimizga murojaat qilishingizni tavsiya qilamiz: https://t.me/huquqplus_bot
Hozirda ajrashganim yoq sud 6 oy vaqt bergan. Erim bilan yashamayman. 2nafar farzandim bor. Hozirda Universitetda oqiyman. Menga bolalar puli ajratiladimi
Ha, sizning holatingizda Bolalar nafaqasi (xalq tilida «bola puli») olish imkoniyati bor. Bola puli – bu bola parvarishi nafaqasi o’rniga kam ta’minlangan oilalar farzandlari uchun beriladigan nafaqa.
Bola puli olishga asosiy talablar:
Farzandingiz voyaga yetmagan bo‘lsa (18 yoshgacha), bola puli olish huquqiga egasiz. Ajrashish jarayonida yashash uchun ota-onadan biri alohida yashayotgan bo‘lsa ham, bola uchun davlatdan yordam puli olish mumkin. Ammo oilangiz kam ta’minlanganlik mezonlariga javob berishi kerak:
O‘zbekiston Respublikasi Vazirlar Mahkamasining 21.10.2021 yildagi 654-son qaroriga muvofiq, oilaning har bir a’zosiga to‘g‘ri keladigan jami 1 oylik o‘rtacha daromad miqdori minimal iste’mol xarajatlari miqdoridan oshmasa, oila kam ta’minlangan deb e’tirof etiladi. Ya’ni, oilangizning rasmiy daromadi oila a’zolaringiz soniga bo‘linganida kishi boshiga 669 ming so‘mdan oshmasa, demak oilangiz kam ta’minlangan oila hisoblanadi.
Bola pulini taynlatish masalasi bo‘yicha, o‘zingiz yashayotgan hududdagi «Inson» ijtimoiy xizmatlari markazlariga borib murojaat qilishingiz kerak bo‘ladi. Yoki onlayn arizani Yagona interaktiv davlat xizmatlari portali my.gov.uz orqali berish mumkin va bu xizmatdan foydalanish bepul. Video qo’llanma: https://youtu.be/V4HIzDAWmKY?si=j11jfZWfbbdqZA-X
. Erim bilan yashamayman. 2nafar farzandim bor. Hozirda Universitetda oqiyman. Menga bolalar puli ajratiladimi
Savolingizga javob berdik. Murojaatingiz uchun rahmat!
Assalomu aleykum men yanvar oyida ijtimoiy himoya yagona reestriga kam taminlangan oila sifatida kiritildim ikki nafar farzandim bor kattasi 5yosh kichigi 6oylik bola puliga o’tdingiz degan malumot keldi davlat bu holatda qancha pul ajratadi
Vaalaykum assalom, Saida!
2025-yil holatiga koʻra, Oʻzbekistonda kam taʼminlangan oilalarga bolalar nafaqasi va moddiy yordam miqdorlari 2021-yilda belgilangan darajada saqlanib qolgan. Yaʼni, bolalar nafaqasi va moddiy yordam miqdorlari oʻzgarmagan.
Oʻzbekistonda kam taʼminlangan oilalarga bolalar nafaqasi quyidagi miqdorlarda toʻlanadi:
– 3 yoshdan 18 yoshgacha boʻlgan bitta farzand uchun: 250 000 soʻm
– 3 yoshgacha boʻlgan bitta kichik farzand uchun: 325 000 soʻm
– Oilaning ikkinchi farzandi uchun qoʻshimcha: 150 000 soʻm
– Oilaning uchinchi va undan keyingi har bir farzandi uchun: 100 000 soʻmdan
Bolalar nafaqasi 12 oy muddatga (bola 18 yoshga toʻlgunga qadar), moddiy yordam esa 6 oy muddatga toʻlanadi. Ariza berish uchun my.gov.uz portali orqali onlayn murojaat qilish yoki yashash joyidagi mahalla fuqarolar yigʻiniga bevosita murojaat etish mumkin.
Assalomu aleykum men ikki nafar voyaga yetmagan farzandlarim uchun fevral oyi uchun 1650000 so’m aliment puli oldim shu oydan bola puliga ham o’tgan lekin tushmayapti lekin ijtimoiy himoya reystridan sizning bola puli to’lovingiz xalq bankiga jo’natildi degan sms keldi mening oilamni har oylik eng kam daromadlarini hisoblashda endi beriladigan bola pulini ham qo’shib hisoblashib har birimizga to’g’ri keladigan daromad oshib ketishini hisoblab pulni tushirib berishmaganmi lekin hozir ham my.gov.uz orqali oilam kam taminlangan deb etirof etilmoqda bugun ko’rdim
Vaalaykum assalom! Qonunchilikda alimentlar oilaning bir oylik o‘rtacha jami daromad miqdorini hisoblab chiqishda inobatga olinadi, deb ko‘rsatilgan. Shunga ko‘ra, olingan aliment oilaga «bola puli» berilishi uchun daromad sifatida hisobga olinishi to‘g‘ri, lekin hech bir hujjatda aliment olingani uchun nafaqa berilmaydi, degan norma keltirilmagan. O‘sha olingan aliment oilaning boshqa daromadlari bilan qo‘shib hisoblaganda oila a’zolari soniga minimal iste’mol xarajatlari miqdoridan oshmasa, ya’ni hozirgi kunda 669 ming so‘mdan oshib ketmasa bo‘ldi, qonunchilikning boshqa talablaridan kelib chiqib bolalar nafaqasi berilishi mumkin. Huquqiy asos: https://lex.uz/docs/-5688101
Ba’zi hollarda, davlat tomonidan ajratiladigan yordam pullari (masalan, bola puli) oilaning jami daromadiga qo‘shib hisoblanadi. Agar aliment va bola puli qo‘shilib, oila daromadi o‘tgan oylarga nisbatan oshib ketsa, siz endi «kam ta’minlangan» toifasiga kirmasligingiz mumkin. Ammo siz my.gov.uz orqali oilangiz hali ham kam ta’minlangan deb e’tirof etilganini ko‘rsatganingiz sababli, pul tushishi kerak.
Shuningdek, agar ijtimoiy himoya reyestridan SMS kelgan bo‘lsa, lekin pul hali hisobingizga tushmagan bo‘lsa, bu texnik kechikish bo‘lishi mumkin. Odatda, bank orqali pul o‘tkazmalari 1-3 ish kunida amalga oshiriladi. Shuning uchun Xalq bankining yaqin bo‘limiga murojaat qilib, to‘lov holatini tekshirib ko‘ring.
Assalomu alaykum menga bu yordam juda zarur edi raxmat sizlarga savolim shundaki meni 9yosh qizim bolalikdan nogiron kam taminlangan oilalar royhatida turamiz lekin bolalar puli ololmayabman juda saron bolib ketim bola puliga ariza topshirsam oilada ishsiz bor dedi bu pul menga juda zaril qizimni eng bolganda 1ta dorisini olaman iltimos sizlardan yordam bering uyda 7oylik chaqalogim bor nogiron bolam bilan ozim bir joyda ishlolmaymanda.
Vaalaykum assalom, Shaxnoza!
Agar 9 yosh nogironligi bor qizingiz bo‘lsa, sizdan rasmiy daromad manbasiga ega bo‘lish, oxirgi 6 oy mobaynida ish izlab kambag‘allikni qisqartirish va bandlikka ko‘maklashish organlariga murojaat qilish hamda bu organlar hisobida turish talabi qo‘yilmaydi. Ya’ni sizning oilangizda I yoki II guruh va bolalikdan nogironligi bo‘lgan 18 yoshgacha shaxslar bo‘lsa sizning oilangizda ishsizlar bor deb bola pulini rad etishi noto‘g‘ri.
Oilani kam ta’minlangan deb e’tirof etish va unga tegishli ravishda bolalar nafaqasi yoki moddiy yordamni tayinlashni rad etish holatlari O‘zbekiston Respublikasi Vazirlar Mahkamasining 21.10.2021 yildagi 654-sonli qarorining 4-bob “Bolalar nafaqasi yoki moddiy yordam olish uchun arizalarni ko‘rib chiqish tartibi”, 20-moddasida ko‘rsatib o‘tilgan. Manba: https://lex.uz/docs/-5688101
Sizga maslahatimiz, hududingizda joylashgan «Inson» ijtimoiy xizmatlar markaziga borib murojaat qiling va vaziyatingizni biz keltirgan huquqiy asoslar bilan tushuntiring. Murojaatingiz uchun rahmat!