
Nogironligi bo‘lgan talabalar uchun ta’lim olish jarayonida belgilangan imtiyozlar
- Matnli format
- Video format
- Oson matn

Nogironligi bo‘lgan talabalar uchun qanday imtiyozlar mavjud?
Bugungi kunda nogironligi bo‘lgan talabalar uchun stipendiya to‘lash, nogironligi bo‘lgan talabalarni talabalar turar-joylari bilan ta’minlash, ularga to‘siqsiz bir muhit yaratish bo‘yicha bir qator imtiyozlar taqdim etilgan. Shunday imtiyozlardan biri bu nogironligi bo‘lgan talabalar uchun 50 foizlik ustamali stipendiyaning joriy qilinganligidir.
Ma’lumot: bugungi kunda umumiy stipendiya miqdori 569 668 so‘mni tashkil etadi. Oliy ta’lim muassasasida ta’lim olayotgan nogironligi bo‘lgan talabaga esa, 569 668 so‘mga 50 foizlik ustama qo‘shib to‘lanadi. Ya’ni, nogironligi bo‘lgan talaba har oy o‘rtacha 854 502 so‘m miqdorida stipendiya oladi.
Nogironligi bo‘lgan talaba stipendiyasiga 50 % lik ustama olish uchun kimga murojaat qilishi lozim?
Nogironligi bo‘lgan talaba 50 foizlik ustama qo‘shib to‘lanadigan stipendiya olishi uchun nogironlik to‘g‘risidagi hujjatni o‘zi ta’lim olayotgan oliy ta’lim muassasasi buxgalteriga taqdim etishi shart. Bunda oliy ta’lim muassasasi buxgalteri nomiga ariza bilan murojaat qilish talab etilmaydi. Nogironlik haqidagi hujjatni taqdim etish kifoya.
Nogironligi bo‘lgan talabalarga beriladigan 50 % lik ustamali stipendiya qaysi guruh nogironligi bo‘lgan talabalarga beriladi?
Ustamali stipendiya olish imtiyozi soha doirasidagi qonunchilik amaliyoti bo‘yicha faqat I va II guruh nogironligi bo‘lgan talabalargagina tatbiq etiladi. O‘zbekiston Respublikasi Vazirlar Mahkamasining 2020-yil 31-yanvardagi 59-son qarori bilan tasdiqlangan nizomda I va II guruh nogironligi bo‘lgan to‘lov-kontrakt asosida ta’lim oluvchi talabalarga stipendiya to‘lovlari O‘zbekiston Respublikasining respublika byudjeti mablag‘lari hisobidan amalga oshiriladi.
Avvalgi o‘quv semestri yakuni bo‘yicha fanlardan o‘zlashtirish ko‘rsatkichlaridan qat’i nazar I va II guruh nogironligi bo‘lgan talabalarga stipendiyaning bazaviy miqdoriga nisbatan 50 foiz oshirilgan miqdorlarda stipendiya tayinlanadi va to‘lanadi.
Semestr yakuni bo‘yicha fanlardan o‘zlashtirish ko‘rsatgichiga qaramasdan nogironligi bo‘lgan talabaga stipendiya to‘lash nima?
Nogironligi bo‘lgan talaba fanlarni o‘zlashtirish ko‘rsatkichlariga nisbatan belgilangan standartlarni bajara olmasa, o‘tilgan fanlar doirasida tashkil etilgan yakuniy nazorat ishlaridan muvaffaqiyatli o‘ta olmasdan ikkinchi semestrga qolib ketsa, nafaqat ustamali stipendiya balki, stipendiya olish huquqidan ham mahrum bo‘ladi.
Talabalarga stipendiya to‘lash tartibi borasidagi qonunchilikka ko‘ra, davlat granti asosida ta’lim olayotgan talaba fanlarni o‘zlashtirish darajasi belgilangan standartlarga javob bermasa, keyingi semestrdan o‘sha talaba stipendiya olish huquqidan foydalana olmaydi. Bu bevosita nogironligi bo‘lgan talabalarga ham taalluqli hisoblanadi. Talabalarning fanlarni o‘zlashtirish standarti deganda, “2” bahodan yuqori ball olish ko‘rsatkichi nazarda tutiladi. Ya’ni, nogironligi bo‘lgan talaba o‘tilgan fanlarni o‘zlashtirish darajasi 3 baho ko‘rsatkichida bo‘lsa ham qo‘shimcha ustamali stipendiya olish imkoniyatiga ega bo‘ladi.
Ikkinchi mutaxassislikka o‘qiyotgan nogironligi bo‘lgan talabalarga ham ustamali stipendiya beriladimi?
Ushbu imtiyoz ikkinchi mutaxassislikda o‘qiyotgan nogironligi bo‘lgan talabalar uchun ham taalluqlidir. Misol uchun nogironligi bo‘lgan shaxs Mirzo Ulug‘bek nomidagi O‘zbekiston milliy universitetini bitirgan. Ishga kira olmaganligi uchun ikkinchi mutaxassislik bo‘yicha Toshkent davlat pedagogika universitetiga o‘qishga kirdi. Mana shu holatda ham nogironligi bo‘lgan talabaga ustamali stipendiya beriladi. Biroq, nogironligi bo‘lgan talaba ikkinchi mutaxassislik bo‘yicha ta’lim olayotganligi uchun to‘lov kontrakti asosida o‘qiydi.
Nogironligi bo‘lgan talabalarni moddiy rag‘batlantirish bilan bog‘liq yana qanday imtiyozlar mavjud?
Nogironligi bo‘lgan talabalarni moddiy rag‘batlantirishda ham bir qator imtiyozlar qonunchilikda belgilangan. Ya’ni, har bir oliy ta’lim muassasasida talabalarni moddiy rag‘batlantirib borish bo‘yicha oliy ta’lim muassasasi qoshida “talabalarni rag‘batlantirish jamg‘armasi” tashkil etilgan. Mazkur jamg‘arma mablag‘laridan foydalanish, jamg‘arma mablag‘lari hisobiga talabalarni moddiy qo‘llab-quvvatlash, oliy ta’lim muassasasining kengashi tomonidan tasdiqlanadigan tartibga muvofiq amalga oshiriladi. Jamg‘arma mablag‘laridan davlat granti va to‘lov-kontrakt asosida ta’lim olayotgan talabalarga to‘lov qaysi shaklda (stipendiyali yoki stipendiyasiz) amalga oshirilishidan qat’i nazar, belgilangan mezonlar asosida rag‘batlantirish to‘lovlari tayinlanadi. Oliy ta’lim muassasalarida to‘lov-kontrakt asosida ta’lim olayotgan (stipendiyali yoki stipendiyasiz shaklda ekanligidan qat’i nazar), o‘quv semestri yakuni bo‘yicha fanlardan o‘zlashtirish ko‘rsatkichlari “a’lo” baho (reyting ko‘rsatkichi 86 ball va undan yuqori) bo‘lgan talabalar stipendiyaning bazaviy hisoblash miqdoriga nisbatan 20 foiz miqdorida Jamg‘arma hisobidan rag‘batlantiriladi.
Masalan, nogironligi bo‘lgan talaba Jahon tillar universitetida ikkinchi mutaxassislik bo‘yicha to‘lov-kontrakt asosida ta’lim oladi. Nogironligi bo‘lgan talaba semestrni hamma fanlar bo‘yicha a’lo baholar bilan tugatdi. Mana shu holatda, nogironligi bo‘lgan talaba umumiy stipendiya miqdoriga nisbatan moddiy yordam sifatida 20 foiz qo‘shimcha pul olishi mumkin.
Ma’lumot: Bugungi kunda stipendiya miqdori 569 668 so‘m deb oladigan bo‘lsak, fanlarni o‘zlashtirish darajasi yuqorida keltirilgan talablarga to‘g‘ri keladigan talabaga moddiy yordam sifatida umumiy stipendiya summasiga nisbatan 20 foizli moddiy yordam puli ajratiladi. Nogironligi bo‘lgan talaba umumiy stipendiya miqdorining 20 foiziga teng keladigan moddiy yordam pulini olishi uchun o‘tilgan fanlar imtihonlaridan a’lo darajali o‘tib, semestrni ijobiy yakunlagan bo‘lishi shart.
Oliy ta’lim muassasalari qoshida tashkil etilgan “talabalarni rag‘batlantirish jamg‘armasi” tomonidan stipendiyaning asosiy miqdoriga nisbatan 50 foizlik qo‘shimcha moddiy yordam belgilanishi mumkin. 50 foizlik moddiy yordamga ega bo‘lishi uchun nogironligi bo‘lgan talaba alohida bir qobiliyatini ta’lim jarayonlarida namoyon qilishi talab etiladi.
Masalan: innovatsion g‘oyalarga asoslangan loyihalarni ishlab chiqqan bo‘lishi yoki jamiyat uchun foyda keltiradigan qurilmalar, ilovalarni ommaga taqdim etgan bo‘lishi kerak. Ya’ni, “Kitobplus” ilovasi yoki “O‘zbekcha nutq sintezatori” kabi loyihalarni muvaffaqiyatli amalga oshirgan bo‘lishi kerak.
Jamg‘arma hisobidan beriladigan moddiy yordam bir marotabalik xususiyatga ega bo‘lib, nogironligi bo‘lgan shaxslar stipendiyasiga qo‘shiladigan ustamadan tashqari belgilanadigan summa hisoblanadi. Bu turdagi moddiy yordamni olish uchun talaba “talabalarni rag‘batlantirish jamg‘arma”si rahbari nomiga ariza bilan murojaat qilishi talab etiladi. (Ariza namunasi 1-ilovada).
Nogironligi bo‘lgan talabalar uchun yotoqxonalariga joylashishda imtiyozlar mavjudmi?
2024/2025 o‘quv yilidan boshlab barcha kurs talabalari uchun davlat oliy ta’lim muassasalari talabalar turar joyiga joylashish onlayn shaklda amalga oshiriladi. Bunda talabalar turar joyiga joylashish uchun ariza berish 1-avgustdan boshlab o‘quv yili yakuniga qadar davom etadi
quyidagi toifadagi talabalar ustuvorlik asosida talabalar turar joylariga qabul qilinadi:
- “Mehribonlik uylari” tarbiyalanuvchilari, yetim va ota-ona qaramog‘idan mahrum bo‘lgan talabalar;
- “Ijtimoiy himoya yagona reyestri”, “Temir daftar” va “Ayollar daftari”ga kiritilgan ijtimoiy himoyaga muhtoj oilalarning farzandlari hamda “Yoshlar daftari”da turadigan talabalar;
- I va II guruh nogironligi bo‘lgan talabalar
Nogironligi bo‘lgan talabalarni yotoqxona bilan ta’minlash tartibi qanday?
Nogironligi bo‘lgan talabalar talabalar turar-joylari bilan ta’minlanishdagi imtiyozli shaxslar sanalishadi. Talabalar turarjoylari bilan ta’minlashda ularning holatlari birinchi navbatda inobatga olinadi. Nogironligi bo‘lgan talabalarning talabalar turarjoylariga joylashishlari va undan foydalanishdagi to‘lovlarda ham o‘ziga xos imtiyozlar qonunchilikda nazarda tutilgan. Bu masala Oliy ta’lim muassasalari talabalar turar joyida yashashning umumiy qoidalari Vazirlar Mahkamasining 2023-yil 14-avgustdagi 376-son qarori bilan tasdiqlangan ma’muriy reglament asosida amalga oshiriladi.
Bugungi kunda talabalar turarjoyida yashash umumiy to‘lovi – 250 ming so‘mni tashkil etadi. I guruh nogironligi bo‘lgan talabalar talabalar turarjoylarida davlat hisobidan bepul turishadi. II guruh nogironligi bo‘lgan talabalar talabalar turargohida yashash uchun belgilangan umumiy to‘lovning 50 foiz miqdorida to‘lovni amalga oshirishadi. Bu bugungi kunda 125 ming so‘mni tashkil etadi.
Ilova:
Foydalanilgan manbalar:
- O‘zbekiston Respublikasi Vazirlar Mahkamasining 2020-yil 31-yanvardagi 59-son qarori bilan tasdiqlangan “Oliy ta’lim muassasalari talabalariga stipendiyalar tayinlash va to‘lash tartibi to‘g‘risida”gi nizom;
- Vazirlar Mahkamasining 2023-yil 14-avgustdagi 376-son qarori bilan tasdiqlangan “Davlat oliy ta’lim muassasalarining talabalarini talabalar turar joyiga joylashtirish bo‘yicha davlat xizmatlari ko‘rsatishning ma’muriy reglamenti”
Bu maqolada sen nogironligi bor talabalarning o‘qish paytidagi imtiyozlari haqida bilib olasan.
Talaba – bu universitetda o‘qiydigan inson.
Nogironligi bor talabalarga:
- stipendiya to‘lash
- yotoqxona bilan ta’minlash
- va boshqa qulayliklar yaratilgan
Nogironligi bor talabalarning stipendiyalariga 50 foiz stipendiya qo‘shib beriladi.
Barcha uchun stipendiya 517 880 (besh yuz o‘n yetti ming sakkiz yuz sakson) so‘m bo‘lsa, nogironligi bor talabaning stipendiyasi 776 820 (yetti yuz yetmish olti ming sakkiz yuz yigirma) so‘m bo‘ladi.
Sening stipendiyangga 50 foiz pul qo‘shilishi uchun:
- nogironlik hujjatingni va universitet hisobchisi nomiga ariza berishing kerak.
50 foizli qo‘shimcha stipendiya faqat birinchi va ikkinchi guruh nogironligi bor talabalarga beriladi.
Vazirlar Mahkamasining nizomiga ko‘ra:
- shartnomada o‘qiydigan birinchi va ikkinchi guruh nogironligi bor talabalarga stipendiyalar davlat hisobidan beriladi.
Birinchi va ikkinchi guruh nogironligi bor talabaning o‘zlashtirishi 3 bahodan past bo‘lmasa 50 foizli qo‘shimcha stipendiya beriladi.
Nogironligi bor talaba:
- fanlardan o‘zlashtirishi 3 bahodan past bo‘lsa
- yakuniy nazorat ishlaridan o‘ta olmasa
- ikkinchi semestrga qolib ketsa stipendiya ham, qo‘shimcha stipendiya ham berilmaydi.
Davlat grantida o‘qiydigan talabaning fanlarni o‘zlashtirishi 3 bahodan past bo‘lsa, keyingi semestrdan stipendiya berilmaydi.
Ikkinchi mutaxassislikda o‘qiyotgan nogironligi bor talaba ham qo‘shimcha stipendiya olishi mumkin.
Masalan:
- Sen Mirzo Ulug‘bek nomidagi O‘zbekiston milliy universitetini bitirgansan.
- Ishga kira olmaganing uchun ikkinchi mutaxassislik bo‘yicha Toshkent davlat pedagogika universitetiga o‘qishga kirding.
- Bu holatda senga shartnomada o‘qisang ham qo‘shimcha stipendiya beriladi.
Har bir universitetda talabalarga rag‘batlantirish pullari berish bo‘yicha “talabalarni rag‘batlantirish jamg‘armasi” tashkil etilgan.
“Talabalarni rag‘batlantirish jamg‘armasi” pullaridan foydalanish va talabalarni qo‘llab-quvvatlash tartibini universitet kengashi tasdiqlaydi.
Talaba davlat granti yoki shartnomada o‘qisa ham jamg‘arma hisobidan rag‘batlantirish beriladi.
To‘lov-shartnoma asosida o‘qiydigan va fanlardan yakuniy imtihonlardan “5” baho olgan talabalarning stipendiyasiga 20 foizli qo‘shimcha stipendiya beriladi.
Masalan:
- Sen Jahon tillar universitetida ikkinchi mutaxassislik shartnomada o‘qiysan.
- Sen semestrni hamma fanlarini 5 bahoga tugatding.
- Sening stipendiyangga 20 foiz qo‘shimcha pul qo‘shib beriladi.
Jamg‘arma 50 foizlik qo‘shimcha stipendiya ham berishi mumkin.
50 foizlik stipendiyani olish uchun sen:
- jamiyat uchun foyda keltiradigan qurilmalar,
- ilovalarni ishlab chiqqan bo‘lishing
- Ya’ni, “Kitobplus” ilovasi
- yoki “O‘zbekcha nutq sintezatori” kabi loyihalar qilgan bo‘lishing kerak.
Jamg‘arma hisobidan beriladigan qo‘shimcha stipendiya faqat bir marta beriladi.
Jamg‘arma hisobidan beriladigan qo‘shimcha stipendiya senga beriladigan 776 (yetti yuz yetmish olti) ming stipendiyadan tashqari beriladigan pul hisoblanadi.
Qo‘shimcha stipendiya olish uchun sen “Talabalarni rag‘batlantirish jamg‘armasi” rahbariga ariza bilan murojaat qilishing kerak.
Nogironligi bor talabalarni yashash joyi bilan ta’minlanishda ham imtiyoz bor.
Seni yotoqxonaga joylashish va yotoqxona to‘lovlarida imtiyozlaring bor.
Hozirda barcha uchun yotoqxona talabalar to‘lovi – 250 000 (ikki yuz ellik ming) so‘m.
Birinchi guruh nogironligi bor talabalar yotoqxona uchun to‘lov to‘lamaydilar.
Ikkinchi guruh nogironligi bor talabalar yotoqxona uchun 50 foiz to‘lov to‘lashadi.
To‘lovning 50 foizi hozirda 125 (bir yuz yigirma besh ming) so‘m.
Qizim 2 guruh nogironi chirchiq pedagogika universitetida oʻqishga kirdi yotoqxonaga oldindan toʻlov qilinar ekan men 4 oylikni toʻladim 300ingdan lekin keyin bilsam 50% toʻlov qilish kk ekan qaytarib olsa yoki keyingi oylarga toʻlasam boʻladimi
Assalomu alaykum, sizga Chirchiq Pedagogika Universiteti buxgalteriya bo‘limiga murojaat qilishni tavsiya qilamiz. 50% ortiqcha to‘lagan mablag‘larini qaytarib berishga kafolat berolmaymiz, chunki siz to‘lovni amalga oshirib bo‘lgan ekansiz.
Keyingi safar 50% chegirma bilan to‘lovni qilishingiz mumkin bo‘ladi – ya’ni 3 oydan so‘ng. Lekin baribir universitet buxgalteriyasidan bu masalani aniqlashtirishingiz kerak bo‘ladi.
Assalom alaykum men 2-grux nogironiman ko’z bo’yicha. Yolgiz ayolman. Oilada 3 kishimiz. 1.Og’lim 1-grux nogironi. 2. Qizim 2-gurux nogironi. Kambag’alik restirida turamiz. Og’lim 1-grux nogiron jismoniy harakati cheklangan. kuchayib boruvchi mushaklar distrofiyasi deyagnizi bilan. Shu o’g’lim kontrakt asosida o’qishga qabul qilindi masofaviy.
Hokimiyat tomonidan 50 %homiylardan tomonidan yordam oldim insitut nogironligini hisobga olmadi kontraktni qolgan qismini qaerdan yordam olsam bo’ladi?
Assalomu alaykum, hurmatli fuqaro!
Kontrakt bo‘yicha imtiyoz faqat:
1) O‘zbekistondagi har qanday OTMlarda o‘qiyotgan «Ayollar daftari»ga kiritilgan ehtiyojmand xotin-qizlar yoki ularning o‘qiyotgan ikki va undan ortiq farzandlarining biriga;
2) kollej, texnikum va (davlat, nodavlat, O‘zbekiston xorijiy) OTMlarida bakalavrning kunduzgi, sirtqi va kechki shaklida, magistraturaning kunduzgi yo‘nalishida o‘qiyotgan «Yoshlar daftari»ga kiritilganlarga hamda «Temir daftar»ga kiritilganlarning farzandlariga.
3) Yoshlar daftariga kiritilganlar uchun kontrakt summasining 50 foizigacha, biroq BHMning 50 baravaridan oshmagan miqdorda moddiy yordam ko‘rsatiladi.
4) «Ayollar daftari»ga kiritilganlar uchun esa BHMning 15 baravaridan oshmagan miqdorgacha mablag‘ ajratiladi.
Ma’lumot uchun, super kontraktda yoki ikkinchi mutaxassislikda o‘qiyotganlarga ushbu imtiyoz qo‘llanilmaydi. Yanada batafsil ma’lumot olishingiz uchun Oliy ta’lim vazirligi qisqa raqamiga aloqaga chiqishingiz mumkin: 1006
Murojaatingiz uchun rahmat!
salom hozir men 2 mutaxaslikda o`qiman senga spendiya berilmaydi deyabdi nima qilsam boladi
Sizga stipendiya berilishi lozim. Dastlab, tyutoringiz va dekanatingizga murojaat qiling. Ular bu masalada yordam berishlari lozim.
Agarda sizga ular yordam bera olishmasa, bizning @huquqplus_bot Telegram botimiz yoki +998 (90) 358-50-60 telefon raqamimizga telefon qiling. Biz yuridik jihatdan yordam beramiz.
Assalomu alaykum men 2021-yil o’qishga kirgan edim 2022-yil sog’ligim tufayli akademiski tatil chiqgan edim 2023 – yil sirtqi ta’limga pervod qildim. Hozir kunda 5-kurs talabasiman fan kiridedim bor ekan lekin menda 2-guruh nogironlik haqida ma’lumot bor. Fan keridedi to’lashim shartmi yo to’lash mumkin emasmi
Vaalaykum assalom! Savolingizni yaxshi tushunmadik – biroz xatolar bilan yozgan ekansiz. Menimcha fan kredit modulidan yiqilgan bo‘lsangiz agar, shuni qayta topshirishga to‘lashingiz shartmi yoki yo‘q deb so‘ramoqchisiz? Siz qaysi oliy ta’lim muassasasida ekanligingiz haqida ma’lumot bermabsiz. Masalan, Toshkent davlat yuridik universiteti kengashi qaroriga binoan, 2024/2025-o‘quv yili bahorgi semestri natijalariga ko‘ra akademik qarzdor bo‘lgan quyidagi toifaga kiruvchi talabalarga fanlardan bir marotaba to‘lovdan ozod qilish asosida intensiv kurslar o‘qishga imtiyoz berildi:
🟢 «Ijtimoiy himoya yagona reyestri», «Temir daftar» va «Ayollar daftari» ga kiritilgan oilalar farzandlari;
🟢 Mehribonlik uyi tarbiyalanuvchilari va chin yetim talabalarga;
🟢 I – II -guruh nogironligi bo‘lgan talabalarga.
Eslatma: Ushbu imtiyoz faqat 2024/2025-o‘quv yilida o‘tilgan fanlardan qarzdor bo‘lgan talabalarga tegishli, ya’ni 2-kursda qolgan fanlarga.
1- kursda o‘tilgan fanlardan qarzdor bo‘lgan yuqorida keltirilgan toifaga kiruvchi talabalar haq to‘lab o‘qishlari lozim.
❗️Ushbu imtiyozga kiruvchi talabalar kontrakt.edu.uz orqali intensiv kurslar uchun ariza bermang, shartnoma olmaslik kerak
Ma’lumot uchun: 🔴»Yoshlar daftari»ga kiritilgan talabalar to‘lovdan ozod etilmaydi.
Bu masalada aynan siz tahsil olayotgan universitet ma’muriyatiga murojaat qilib batafsil ma’lumot olishni tavsiya qilamiz. Sizga ham 2-guruh nogironligi bor shaxs sifatida imtiyoz bor deb o‘ylaymiz.
Farzandim 2guruh nogironligidan 3guruh nogironligiga tayinlandi hozir kursdan kursga qolgan uqishi tiklanganda grandga riklanadimi yoki kontraktga
Assalomu alaykum, agar farzandingiz kursdan kursga qolgan bo‘lsa, avtomatik tarzda kontraktga tushadi. Ushbu tartib, O‘zbekiston Respublikasi Vazirlar Mahkamasining qarori, 13.09.2025 yildagi 578-son qarorida (https://lex.uz/uz/docs/-7726569) ko‘zda tutilgan. I va II guruh nogironligi shaxslar oliy ta’lim muassasasiga o‘qishga 2% kvota granti asosida o‘qishga kirgandan so‘ng 4 yil mobaynida davlat granti saqlanib turadi. Ammo, nogironligi bor talaba kursdan kursga qolib ketsa, davlat granti tugatiladi avtomatik tarzda va kontrakt asosida o‘qishga tushib ketadi. Keyinchalik, agar farzandingiz o‘qishga tiklansalar, baribir kontrakt asosida o‘qishlariga to‘g‘ri keladi.
Shuningdek, agar farzandingiz 3-guruh nogironligiga tushirilgan bo‘lsalar, unda 2% kvota ularga amal qilmaydi afsuski.
Batafsilroq ma’lumot olish uchun O‘zbekiston Respublikasi Oliy ta’lim, fan va innovatsiyalar vazirligi ishonch telefoni 1006 raqamiga murojaat qilishni tavsiya qilamiz.
Assalomu alaykum 2 guruh nogironligi bo’lgan shaxslar kunduzgidan masofaviyga ko’chirganda kantrakt to’laydimi
Assalom alaykum, hurmatli fuqaro! Masofaviy shaklda grant ajratilmaydi. Faqat shartnoma (kontrakt) asosida barcha talabalar o‘qiydi. Har yili Davlat qabul komissiyasi faqat bakalavriat kunduzgi ta’lim shakliga — grant o‘rinlari ajratiladi. E’tiboringiz uchun rahmat!
Assalomu alaykum men 1 guruh ko’z boyicha nogironligim bor nen bir fandan yiqildim menga yozgi tatilda qayta pul tolab oqishni aytishdi menga qancha vaqt stipendiya tushmaydi 6 oymi yoki 1 oy
Assalom alaykum, hurmatli fuqaro! Sizning holatingiz bo‘yicha O‘zbekiston Respublikasi qonunchiligida alohida imtiyozli tartib belgilangan.
O‘zbekiston Respublikasi Vazirlar Mahkamasining 2020-yil 31-yanvardagi 59-son qarori: (https://lex.uz/docs/-4725554)
12-band: 1 va 2-guruh nogironligi bo‘lgan talabalarga, hatto ular to‘lov-kontrakt asosida ta’lim olsa ham, stipendiya to‘lovlari O‘zbekiston Respublikasining respublika budjeti mablag‘lari hisobiga amalga oshiriladi.
13-band: Avvalgi o‘quv semestri yakuni bo‘yicha fanlardan o‘zlashtirish ko‘rsatkichlaridan qat’i nazar (ya’ni baholaringiz qanday bo‘lishidan qat’i nazar), 1 va 2-guruh nogironligi bo‘lgan o‘zlashtirayotgan talabalarga stipendiyaning bazaviy miqdoriga nisbatan 50 foiz yuqori (oshirilgan) miqdorda stipendiya tayinlanadi va to‘lanadi.
6-band «b» kichik bandi: O‘quv semestri yakuniga ko‘ra fanlarning 30 foizidan ortig‘ini «qoniqarli» (71 balldan kam) bahoga yopgan talabalarga stipendiya tayinlanmasligi haqidagi qoida 1 va 2-guruh nogironligi bo‘lgan talabalarga nisbatan tatbiq etilmaydi.
Sizning vaziyatingizga qo‘llanilishi: Siz 1-guruh nogironi bo‘lganingiz sababli, bir fandan akademik qarzdorligingiz (yiqilganingiz) stipendiya olish huquqingizni yo‘qotishga asos bo‘lmaydi. Qonunchilikka ko‘ra, sizga stipendiya to‘lash to‘xtatilishi kerak emas.
Sizga stipendiya tushmaydigan muddat (6 oy yoki 1 oy) haqidagi talab umumiy tartibdagi talabalarga tegishli bo‘lib, siz kabi imtiyozga ega shaxslar uchun o‘zlashtirish ko‘rsatkichidan qat’i nazar stipendiya to‘lanishi davom etishi shart. Shuningdek, sizga bazaviy stipendiyadan 50 foiz yuqori miqdorda haq to‘lanishi lozim.
Muhim eslatma: Agar siz akademik qarzdorlikni bartaraf etish uchun yozgi ta’tilda qayta o‘qishga jalb etilsangiz ham, o‘quv rejasi asosidagi ta’tillar davrida stipendiya olish huquqingiz saqlanib qoladi (Nizomning 26-bandi).
Huquqiy asos: https://lex.uz/docs/-4725554
Assalomu alaykum
Nogironlgi bor talaba kreditga qolsa stipendiyadan mahrum bo’ladimi?
Assalomu alaykum! Hurmatli fuqaro, nogironligi bo‘lgan talaba fanlarni o‘zlashtirish ko‘rsatkichlariga nisbatan belgilangan standartlarni bajara olmasa, o‘tilgan fanlar doirasida tashkil etilgan yakuniy nazorat ishlaridan muvaffaqiyatli o‘ta olmasdan ikkinchi semestrga qolib ketsa, nafaqat ustamali stipendiya balki, stipendiya olish huquqidan ham mahrum bo‘ladi. Talabalarga stipendiya to‘lash tartibi borasidagi qonunchilikka ko‘ra, davlat granti asosida ta’lim olayotgan talaba fanlarni o‘zlashtirish darajasi belgilangan standartlarga javob bermasa, keyingi semestrdan o‘sha talaba stipendiya olish huquqidan foydalana olmaydi. Bu bevosita nogironligi bo‘lgan talabalarga ham taalluqli hisoblanadi. Talabalarning fanlarni o‘zlashtirish standarti deganda, “2” bahodan yuqori ball olish ko‘rsatkichi nazarda tutiladi. Ya’ni, nogironligi bo‘lgan talaba o‘tilgan fanlarni o‘zlashtirish darajasi 3 baho ko‘rsatkichida bo‘lsa ham qo‘shimcha ustamali stipendiya olish imkoniyatiga ega bo‘ladi.
Batafsil ushbu havola orqali ko‘rib chiqishingiz mumkin: https://huquqplus.uz/materials/talim/1877
2-guruh nogronligi bilan masofaviy oʻqishga kirdim va keyingi yil 3 ga tushishim mumkin shunday holatda davlat garndi saqlanib qoladimi
Assalom aleykum hurmatli fuqaro, Oʻzbekiston Respublikasi Vazirlar Mahkamasining 10.03.2025 yildagi 149-sonli qarorda belgilangan tartibga ko’ra, quyidagi talabalarga davlat granti 4 yil uchun beriladi va ular grant taqsimotida ishtirok etmaydi:
Imtiyoz asosida talabalikka tavsiya etilganlar. Bular:
a) yetim yoki chin yetim bo’lgan, mehribonlik uylarida tarbiyalangan talabalar;
b) nogironligi bo’lgan talabalar;
d) harbiy xizmatchilar hamda ularning farzandlari bo’lgan talabalar;
e) hududiy kvota egalari (masalan, Qoraqalpog’iston Respublikasidan bo’lgan talabalar).
Shuningdek, Prezident va vazirliklar tomonidan ajratilgan maxsus grant hamda Xalqaro fan olimpiadalari, nufuzli tanlovlarda g’olib bo’lganda beriladigan grantga sazovor bo’lgan talabalarning davlat granti o’qish yakuniga qadar amal qiladi.
Xulosa qilib aytganda, siz 4 yil mobaynida qrantga o’qiysiz. ✅
Asos: https://www.lex.uz/uz/docs/-7429154