Asosiy mazmunga oʻtish
Ortga

Nogironlik pensiyasini qanday qilib qayta hisoblatish mumkin?

  • Matnli format
  • Video format
  • Oson matn

Bu maqolada nogironlik pensiyasini ish stajiga qarab qayta hisoblatish haqida bilib olasan.

2023-yil 1-yanvardan boshlab sen nogironlik pensiyangni har 2 yilda 1 marta

  • ishlagan vaqting
  • oyligingga qarab qayta hisoblatishing uchun “Fuqarolarning davlat pensiya ta’minoti to‘g‘risida”gi qonuniga o‘zgartirish kiritildi.

2023-yilda 75 mingta nogironligi bor insonlarning pensiyasiga 300 000 (uch yuz ming) so‘mdan qo‘shildi.

Sen pensiyani qayta hisoblatishing mumkin bo‘lgan holatlar:

  • sening nogironlik guruhing o‘zgarganda.

Senga birinchi va ikkinchi guruh nogironlik pensiyasi berilganidan keyin ishlagan vaqting va oyligingga qarab 2 yilda 1 marta pensiyang qayta hisoblab ko‘paytiriladi.

Masalan:

  • Sen 2 yil ya’ni 2022-yildan 2024-yilgacha ishlagansan.
  • Bunda sening pensiyang qayta hisoblanadi va ko‘paytiriladi.

Sening pensiyangni hisoblash uchun oxirgi 10 yillik ishlagan vaqting hisobga olinadi.

Sening pensiyangni hisoblash uchun oxirgi 10 yillikdagi  5 yillik oyliklari qo‘shilib 60 ga bo‘linadi.

Nogironlik pensiyasini qayta hisoblashda:

  • sening ishlangan vaqting
  • oyliging
  • qayta hisoblash uchun sabablar hisobga olinadi.

Vazirlar Mahkamasining “Davlat pensiyalarini tayinlash va to‘lash tartibi to‘g‘risida”gi Nizomning 125-bandiga ko‘ra,  pensiyani qayta hisoblash uchun sabablar paydo bo‘lganda sen ariza bilan murojaat qilishing kerak. 

Sen arizaga qo‘shib pensiyani qayta hisoblashga sabab bo‘ladigan hujjatlarni ham topshirishing kerak bo‘ladi.

Pensiyani qayta hisoblashga sabab bo‘ladigan hujjatlar:

  • sening nogironlik guruhing o‘zgarganligi haqidagi hujjat
  • sen 1 yildan ko‘p ishlaganliging  haqidagi hujjat.

Pensiya jamg‘armasi  besh kunda sening pensiyangni qayta hisoblash haqidagi arizangni ko‘rib chiqadi (Ariza shakli ilova qilingan).

Sen pensiyani qayta hisoblatishda avval ishlatilgan hujjatlar yoki pensiyani qayta hisoblashga kerak bo‘lmagan hujjatlar topshirsang sening pensiyang qayta hisoblanmaydi.

“Fuqarolarning davlat pensiya ta’minoti to‘g‘risida”gi qonunning 32-moddasiga  ko‘ra, sening xohishingga qarab, sen o‘qish vaqtida olgan stipendiyang ham oylik hisoblanadi.

Stipendiya – bu talabalarga qoʻshimcha taʼlim olish uchun beriladigan pul yordami.

Agar sen o‘qish davrida olgan stipendiyangni ham oylik  sifatida olmoqchi bo‘lsang, bu to‘g‘risida pensiya jamg‘armasiga aytishing kerak.

Sen nogironlik pensiyasini qayta hisoblatishing uchun (tuman) shahar Pensiya jamg‘armasiga borib ariza berishing shart.

Nogironlik pensiyasini qayta hisoblatishda eng ko‘p muammo bu ishlagan vaqt haqidagi ma’lumotlar Yagona Milliy Mehnat Tizimi ya’ni my.mehnat.uz internet manzilida ko‘rinmasligidir.

Yagona Milliy Mehnat Tizimi bu – my.mehnat.uz internet manzili. Bu yerda insonlarning ish staji va bandligi haqidagi ma’lumotlar saqlanadi.

Sening ishlagan vaqting my.mehnat.uz internet manzilida ko‘rinmasa, ishlagan joyingga murojaat qilishing  va ishlaganingni tasdiqlovchi hujjatni olishing  kerak.

Ishga kirganingda yoki ishdan bo‘shaganingda tashkilotning ishchilar bilan ishlovchi xodimidan ma’lumotlaringni my.mehnat.uz ga kiritganligi haqidagi hujjatni so‘rashing kerak.

Pensiya jamg‘armasi sening pensiyangni qayta hisoblashni rad etsa, uning sabablari, bu bo‘yicha shikoyat qilish tartibi haqida senga 5 kun ichida  “SMS” xabar yuborishi shart.

“Nogironlik pensiyasini qanday qilib qayta hisoblatish mumkin?” ga 33 ta javob

  1. Assalomu Alaykum 2-guruh nogironiman maktabda ishlayman daromad soligʻidan imtiyoz bor pensiyaga hisoblaysan imtiyozga taʼsiri yuqmi oldindan raxmat sizlarga

    • Vaalaykum assalom, Olimjon! O‘zbekiston Respublikasi Prezidentining 2021-yil 21-dekabrdagi PQ-57-son qaroriga asosan, Bolalikdan nogironligi bo‘lgan shaxslar hamda I va II guruh nogironligi bo‘lgan shaxslar uchun daromad solig‘i bo‘yicha belgilangan imtiyoz mehnatga haq to‘lashning eng kam miqdorining 1,41 baravaridan 3 baravarigacha oshirilgan. Ya’ni hozirgi kunda 3 mln 465 ming so‘m miqdoridagi oylik maoshingiz daromad solig‘idan ozod qilinadi.
      Soliq qonunchiligida nogironligi bo‘lgan shaxslarning ayrim imtiyozlari haqida batafsil huquqiy maqolamizdam bilib olishingiz mumkin: 👉 https://huquqplus.uz/materials/mehnat/1885

  2. Men Qonunchilik bilan belgilangan Urush nogironlariga tenglashtirilgan 2-guruh nogironoman.Men nogironlik pensiyasi tayinlangandan keyin 17 yil 0,5 stavka asosida ishlaganman.Men 2024-yilda pensiyani qayta hisoblash uchun yashash joyimdagi Qashqadaryo viloyati Mirishkor tumani Pensiya jamgʻarmasiga murojaat qilgandim.Ular ish haqingiz kam boʻlgan,hozirgi holatda olayotgan pensiyangizga taʼsir qilmaydi deyishmoqda ish stajini hisobga olishmadi shu toʻgʻrimi.

    • Assalomu alaykum

      Agarki, sizda ish haqingiz miqdori kam bo‘lgan bo‘lsa, pensiyangizni qayta hisoblatishda, to‘g‘ridan to‘g‘ri ta’sir qiladi ya’ni ish haqingizni past bo‘lgani ta’sirida pensiyangiz deyarli ko‘tarilmasligi mumkin.

      Shunday bo‘lsa-da, siz ariza bilan murojaat qiling. Olgan oyligingiz miqdoridan kelib chiqqan holda, kichik summaga bo‘lsa ham pensiyangiz miqdori o‘zgartirilishi lozim.

    • Qonunchilikka ko‘ra agar siz 56 yoshdan oshmagan bo‘lsangiz ish stajingiz pensiyani qayta hisoblash uchun yetarli bo‘ladi.

      Qonunchilikka ko‘ra, Pensiya miqdori ish stajining muddatiga bog‘liq bo‘lib, quyidagilardan tarkib topadi:

      pensiyaning tayanch miqdoridan;

      ish staji uchun pensiyaning oshirilishidan;

      pensiyaga qo‘shiladigan ustama haqlardan.

      Pensiyaning tayanch miqdori qonunning 26 moddasida quyidagicha berilgan:

      I va II guruh nogironligi bo‘lgan shaxslarga nogironlik pensiyasi uchun — pensiyani hisoblab chiqarish uchun olinadigan o‘rtacha oylik ish haqining 55 foizi, lekin yoshga doir eng kam pensiyaning kamida 100 foizi miqdorida;

      Ushbu qonunning 31-moddasiga ko‘ra Pensiyani hisoblab chiqarish uchun olinadigan o‘rtacha oylik ish haqi ketma-ket ishlangan oltmish kalendar oylar uchun qayta hisoblangan ish haqining umumiy miqdorini oltmishga bo‘lish yo‘li bilan aniqlanadi. Bunda pensiya so‘rab murojaat etgan kishining xohishiga ko‘ra, ishga qabul qilish yoki mehnat shartnomasini bekor qilish munosabati bilan ish kunlari soni to‘liq bo‘lmagan oylar to‘liq ishlangan kalendar oylar sifatida hisobga olinadi.

      Yuqoridagi moddalarni sharhlaganimizda, sizning pensiyangizni hisoblab chiqarishda 5 yillik mehnat faoliyatingiz olinadi va barcha ish haqqilari qo‘shilib 60 ga bo‘linadi va shu miqdorning 55% sizga pensiya sifatida tayinlanadi.

      Endi ish staji uchun pensiyaning oshirilishini ko‘rib chiqaylik:

      Qonunning 17 moddasida pensiyani olish huquqini beradigan ish staji ko‘rsatilgan.

      Masalan 41 yoshdan 46 yoshga qadar 11 yil ish staji talab qilinadi.

      Shuningdek qonunning 27 moddasiga ko‘ra b) I va II guruh nogironligi bo‘lgan shaxslarga nogironlik pensiyalari — pensiyani hisoblab chiqarish uchun olinadigan o‘rtacha oylik ish haqining 1 foizi miqdorida;

      Yani sizda qonunda talab qilinganidan ortiq ish staji mavjud bo‘lsa har bir yil ish staji uchun pensiyangiz 1% oshiriladi.

      28-modda. Pensiyalarga ustama haqlar mavjud urush qatnashchilari va ularga tenglashtirilgan shaxslarga — pensiyani hisoblash bazaviy miqdorining 50 foizi; Ustama haqlar tayinlanayotgan pensiyaning turidan qat’i nazar qo‘shib hisoblanadi.

  3. Assalomu alaykum. Men bolalikdan 2-guruh nogironiman va 2024-yil iyulda ish faoliyatimni boshlaganman. 6 oydan beri dekret taʼtilidaman. Pensiyani qayta hisoblatish uchun dekretda boʻlgan davrlar ham hisobga olinadimi?

    • Assalomu alaykum, Ruxsora!

      Bolani parvarishlash ta’tillari (dekret) davrida xodimning ish joyi (lavozimi) saqlanadi. Bu ta’tillarning ko‘pi bilan olti yili mehnat stajiga qo‘shiladi, shu jumladan mutaxassisligi bo‘yicha ish stajiga ham qo‘shib hisoblanadi. Xulosa qilib aytish mumkinki, dekretda bo‘lgan davringiz ham hisobga olinadi.

      Pensiyalarni qayta hisoblash qonunda belgilangan aniq holatlarda amalga oshiriladi. Bu holatlar pensioner tomonidan qo‘shimcha hujjatlar taqdim etilishi, nogironlik guruhi yoki boquvchisini yo‘qotganlik pensiyasi oluvchilar sonining o‘zgarishi, bazaviy hisoblash miqdorlarining yoki inflyatsiya darajasining oshishi bilan bog‘liq. Shuningdek, I va II guruh nogironlari kamida 1 yil ish stajiga ega bo‘lsa, har ikki yilda bir marta pensiyalarini qayta hisoblash huquqiga ega.

      O‘zbekiston Respublikasi «Fuqarolarning davlat pensiya ta’minoti to‘g‘risida» gi 03.09.1993-yildagi 938-XII-sonli qonunning 49-moddasiga muvofiq: «pensiyalarni qayta hisoblash shartlari» quyidagi holatlarda yuzaga keladi:

      -pensioner pensiya miqdoriga ta’sir ko‘rsatuvchi (pensiya tayinlanishigacha bo‘lgan ish staji va ish haqi to‘g‘risidagi hamda boshqa) qo‘shimcha hujjatlarni taqdim etgan taqdirda;

      -nogironlik guruhi o‘zgarganda;

      boquvchisini yo‘qotganlik pensiyasi oladigan oila a’zolari soni o‘zgarganda;

      -pensiyani hisoblashning bazaviy miqdorlari o‘zgargan taqdirda;

      -yoshga doir eng kam pensiya miqdori o‘zgarganda;

      -daromadlar indeksatsiya qilingan taqdirda amalga oshiriladi. Bunda pensiya miqdori yil davomida tovarlar va xizmatlarning iste’mol narxlari (tariflari) indeksi (inflyatsiya) darajasining o‘sish sur’atlari hisobga olingan holda, O‘zbekiston Respublikasi Prezidentining hujjatlariga asosan indeksatsiya qilinadi (oshiriladi).

      -I va II guruh nogironlik pensiyasi tayinlanganidan keyin kamida 1 yil ish stajiga ega bo‘lsa, fuqaroning arizasi asosida ish staji va ish haqi inobatga olingan holda pensiya har ikki yilda bir marotaba qayta hisoblab chiqiladi. Bunda pensiyani qayta hisoblash fuqaro pensiya miqdorini qayta hisoblash uchun murojaat qilgan sanadagi ushbu Qonunning 17-moddasida ko‘rsatilgan yoshga nisbatan talab qilingan ish stajidan kelib chiqqan holda amalga oshiriladi.

      O‘zbekiston Respublikasi Mehnat kodeksining 405-moddasiga asosan:

      Bolani parvarishlash ta’tillari davrida xodimning ish joyi (lavozimi) saqlanadi. Bu ta’tillarning ko‘pi bilan olti yili mehnat stajiga qo‘shiladi, shu jumladan mutaxassisligi bo‘yicha ish stajiga ham qo‘shib hisoblanadi

      Pensionerlar pensiyani qayta hisoblash uchun ana shunday huquq paydo bo‘lganidan keyin istalgan vaqtda murojaat etishlari mumkin.

  4. Men Avloqulov Qulmamat 2-guruh nogironiman.Nogironlikka chiqqanimdan keyin 17 yil yarim stavka asosida ishladim.Shu ish stajini hujjatlarini Pensiya Jamgʻarmasiga topshirgan edim.Ish haqingiz kam boʻlgan shuning uchun pensiyangizga qoʻshilmadi deyishdi.Ish stajiga qoʻshilmaydimi shu toʻgʻrimi

    • Agar siz nogironlik pensiyasini qayta hisoblagan bo‘lsangiz, demak sizning ish stajingiz yetarli bo‘lgan va ortiqcha har bir ish yilidagi staj uchun sizga 1% dan nogironlik pensiyasizingizga mutanosib ravishda qo‘shib hisoblangan.

      Pensiya miqdorining kam chiqishi esa siz ishlagan davringizda oylik ish haqqi kam olganingiz bilan bog‘liq. Pensiyani qayta hisob kitob qilishda ishlagan yillaringizdagi oxirgi o‘n yillik ish davri olinadi va shu o‘n yillik ichidan ketma ket besh yillik eng yuqori ish haqlaringiz olinadi.

      Bu besh yillik ish haqqi hammasi jamlanadi jamlangan ish haqqi 60 ga bo‘linib shundan chiqqan miqdorning 55% sizga pensiya sifatida tayinlanadi.

  5. Assalom aleykum meni ish haqim my govdan kurinadi soliqdan ham davlat hizmatlariga borib Ariza bersam ish haqim qushiladimi

    • Vaalaykum assalom, savolingizga yaxshi tushunmadik. Agar nogironlik pensiyangizni qayta hisoblatmoqchi bo‘lsangiz, ushub maqolamizda ko‘rsatib o‘tilgan tartib bo‘yicha ariza topshirishingiz mumkin. Siz nogironlik pensiyasini qayta hisoblash uchun arizani Pensiya jamg‘armasining hududiy bo‘limlariga shaxsan tashrif buyurgan holda berishingiz lozim.

      Byudjetdan tashqari Pensiya jamg‘armasi aloqa ma’lumotlari va manzillari
      12−71 qisqa ishonch raqamiga qo‘ng‘iroq qilib, nogironlik pensiyasiga oid savollariga mutaxassislardan javob olishingiz yoki murojaatlaringizni qoldirishingiz mumkin.

      Telefon: +998 (71) 202-12-71
      Manzil: Toshkent sh., Niyozbek yo’li ko’chasi 1.

      Vebsayt: http://www.pfru.uz
      Elektron pochta: pension_uz@pfca.mf.uz

Fikr qoldiring

Email manzilingiz chop etilmaydi. Majburiy bandlar * bilan belgilangan

Ushbu maqola sizga foydali bo‘ldimi? Biz, HuquqPlus.uz jamoasi, har kuni murakkab huquqiy ma’lumotlarni barcha uchun sodda va tushunarli qilish ustida ishlaymiz. Faoliyatimizni o‘zingiz istagan miqdordagi mablag‘ bilan qo‘llab-quvvatlang — bu bizga yangi maqolalar tayyorlash va nogironligi bo‘lgan shaxslar huquqlarini himoya qilishda davom etishimizga yordam beradi.

Xayriya miqdori
to‘lov usuli