
Mehmonxonalarda nogironligi bo‘lgan shaxslarga sharoitlar yaratish uchun subsidiya olish tartibi qanday?
- Matnli format
- Video format
- Oson matn

O‘zbekiston Respublikasi Vazirlar Mahkamasining 2024-yil 12-avgustdagi 498-sonli qarori bilan mehmonxona xizmatlarini ko‘rsatayotgan tadbirkorlarga o‘z binolarini nogironligi bo‘lgan shaxslar ehtiyojlariga moslashtirish xarajatlarining bir qismini davlat tomonidan qoplab berish, ya’ni subsidiya ajratish tartibi joriy etildi. Ushbu maqolada mazkur subsidiyani olish shartlari, miqdori va tartibi haqida batafsil ma’lumot beramiz.
Subsidiya o‘zi nima va u kimlarga beriladi?
Subsidiya — bu davlat tomonidan tadbirkorlik subyektlariga ma’lum bir maqsadli xarajatlarni qoplash uchun beriladigan qaytarib berilmaydigan pul mablag‘idir. Mazkur holatda subsidiya mehmonxona xonalarini nogironligi bo‘lgan shaxslar uchun qulay tarzda jihozlash xarajatlarini qisman qoplash uchun ajratiladi.
Ushbu imtiyozdan mehmonxona xizmatlarini ko‘rsatayotgan barcha tadbirkorlik subyektlari foydalanishi mumkin, biroq ular uchun ikki muhim shart mavjud:
- Tadbirkorlik subyekti to‘lovga qobiliyatsizlik (bankrotlik) jarayonida bo‘lmasligi kerak.
- Tashkilotni tugatish (yopish) ishlari ketayotgan bo‘lmasligi lozim.
Ushbu tartib vaqtinchalik xarakterga ega bo‘lib, 2027-yil 1-yanvarga qadar amal qiladi.
Mehmonxona infratuzilmasini nogironligi bor shaxslarga moslashtirish uchun qo‘yiladigan asosiy talablar
Subsidiyani qo‘lga kiritish uchun shunchaki xonani ajratish kifoya qilmaydi. Qonunchilikda nogironligi bo‘lgan shaxslar uchun yaratilishi lozim bo‘lgan minimal qulayliklar aniq belgilab qo‘yilgan.
Subsidiya olish uchun mehmonxonada kamida uchta xona quyidagicha moslashtirilgan bo‘lishi shart:
- Harakatlanish uchun: O‘rindiqli aravachadan foydalanuvchi shaxslar uchun xona ichida va yuvunish xonalarida moneliksiz harakatlanish imkoniyati yaratilgan bo‘lishi kerak.
- Eshitish va ko‘rish uchun: Xonalarda maxsus displeylar hamda ovozli qurilmalar (masalan, favqulodda holatda signal beruvchi yoki ma’lumot yetkazuvchi uskunalar) o‘rnatilgan bo‘lishi shart.
Ta’kidlash joizki, «Nogironligi bo‘lgan shaxslarning huquqlari to‘g‘risida»gi Qonunning 25-moddasiga binoan, har qanday mehmonxona mulkdori umumiy xonalar fondining kamida bitta xonasini shunday qulay tarzda jihozlashi majburiydir. Davlat tomonidan berilayotgan subsidiya esa ushbu majburiyatni bajarishda tadbirkorga moliyaviy yordam hisoblanadi.
Subsidiya miqdori qancha?
Subsidiyaning miqdori mehmonxonaning toifasiga (yulduziga) qarab belgilanadi va har bir maxsus jihozlangan xona uchun quyidagicha to‘lanadi:
- Yulduz toifasiga ega mehmonxonalarga — har bir xona uchun 2 million so‘m.
- Yulduz toifasiga ega bo‘lmagan mehmonxonalarga — har bir xona uchun 1 million so‘m.
Ushbu mablag‘lar Turizm qo‘mitasi qoshidagi Turizmni qo‘llab-quvvatlash jamg‘armasiga tadbirkorlar tomonidan o‘tkazilgan turistik yig‘imlar hisobidan qoplanadi.
Subsidiyaga ariza qanday topshiriladi?
Subsidiyani olish jarayoni bir necha bosqichdan iborat bo‘lib, arizani to‘liq masofadan turib yoki Davlat xizmatlari markaziga shaxsan borib topshirishingiz mumkin.
Onlayn tarzda arizani Yagona interaktiv davlat xizmatlari portali (my.gov.uz) orqali topshirishingiz. Onlayn murojaat qilinganda elektron raqamli imzo talab etiladi, tizim shaxsni avtomatik identifikatsiya qiladi. Eng muhimi, ushbu davlat xizmati uchun hech qanday yig‘im yoki to‘lov undirilmaydi, ya’ni murojaat qilish bepul.
Agar Yagona interaktiv davlat xizmatlari portali orqali ariza bermoqchi bo‘lsangiz quyidagi tartibda ariza berishingiz lozim:
- https://my.gov.uz/ portali orqali tizimga mehmonxonaning ya’ni tashkilotning elektron raqamli imzosi yordamida kirishingiz kerak.
- Platformaga kirganingizdan so’ng, davlat xizmatlari qidiruv tizimiga “Mehmonxona xizmatlarini ko’rsatayotgan tadbirkorlik subyektlariga infratuzilmani nogironligi bo’lgan shaxslar uchun moslashtirish xarajatlarining bir qismini qoplab berishga subsidiya ajratish” nomli xizmatini tanlaysiz va «Ariza yuborish» tugmasini bosasiz.
- Tashkilot nomida sizning mehmonxonangiz (yuridik shaxs) nomi to‘g‘ri ekanligiga ishonch hosil qilgandan so‘ng, keyingi tugmasini bosishingiz kerak. Mehmonxonangiz nomi, joylashgan manzili, pochta indeksi, muvofiqlik sertifikati va aloqa vositalariga doir ma’lumotlarni kiritish orqali orqali ariza berishni yakunlaysiz.

Ariza kelib tushgandan so‘ng, Turizm qo‘mitasi mutaxassislari 10 ish kuni ichida mehmonxonaga joyiga chiqqan holda boradilar. Ular xonalarning haqiqatdan ham nogironligi bo‘lgan shaxslar uchun moslashtirilganligini va zarur qurilmalar (panduslar, tutqichlar, displeylar) mavjudligini tekshiradilar.
Tekshiruvdan so‘ng 5 ish kuni ichida subsidiya berish yoki rad etish haqida qaror qabul qilinadi. Qaror nusxasi tadbirkorga elektron shaklda yuboriladi.
Subsidiya ajratish haqida ijobiy qaror chiqsa, Turizm qo‘mitasi 10 ish kuni ichida mablag‘ni tadbirkorning bankdagi hisobvarag‘iga o‘tkazib beradi.
Subsidiya olgan tadbirkorning majburiyatlari
Davlatdan pul olgan tadbirkor zimmasiga muhim mas’uliyat yuklanadi. Eng asosiysi, subsidiya olgan mehmonxona kamida besh yil davomida o‘z faoliyatini davom ettirishi shart.
Agar mehmonxona 5 yilga yetmasdan yopilsa yoki uning toifasi pasayib ketsa, tadbirkor olingan subsidiyaning bir qismini (faoliyat yuritilmagan davrga mutanosib ravishda) davlatga qaytarib berishi kerak bo‘ladi. Turizm qo‘mitasi ushbu muddat davomida mehmonxonaning faoliyatini doimiy monitoring qilib boradi.
Nima uchun arizani rad etishlari mumkin?
Subsidiya ajratish faqat ikkita holatda rad etilishi mumkin:
- Arizada ma’lumotlar to‘liq ko‘rsatilmagan bo‘lsa.
- Mehmonxona xonalari belgilangan texnik talablarga javob bermasa.
Boshqa har qanday vajlar bilan subsidiyani rad etishga yo‘l qo‘yilmaydi. Agar rad javobi berilsa, tadbirkor kamchiliklarni tuzatib, qayta murojaat qilish huquqiga egasiz.
O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi kontaktlari:
| Telefon | +99871 205-06-00; |
| Ishonch telefoni | +99871 200-00-88;1163; |
| Veb-sayt | gov.uz/uzbektourism |
| Elektron pochta | info@uzbektourism.uz |
| Manzil | 100084, Toshkent shahri, Amir Temur shoh ko‘chasi, 17-uy |
Foydalanilgan manbalar:
- O‘zbekiston Respublikasining 15.10.2020-yildagi O‘RQ-641-sonli “Nogironligi bo‘lgan shaxslarning huquqlari to‘g‘risida”gi Qonuni, https://lex.uz/docs/-5049511
- O‘zbekiston Respublikasi Vazirlar Mahkamasining 12.08.2024-yildagi 498-sonli “To‘siqsiz turizm orqali turizm imkoniyatlarini yanada kengaytirish bo‘yicha qulay shart-sharoitlar yaratish chora-tadbirlari to‘g‘risida”gi qarori, https://lex.uz/docs/-6759699