
Nogironligi bo‘lgan talabalar uchun ta’lim olish jarayonida belgilangan imtiyozlar
- Matnli format
- Video format
- Oson matn

Nogironligi bo‘lgan talabalar uchun qanday imtiyozlar mavjud?
Bugungi kunda nogironligi bo‘lgan talabalar uchun stipendiya to‘lash, nogironligi bo‘lgan talabalarni talabalar turar-joylari bilan ta’minlash, ularga to‘siqsiz bir muhit yaratish bo‘yicha bir qator imtiyozlar taqdim etilgan. Shunday imtiyozlardan biri bu nogironligi bo‘lgan talabalar uchun 50 foizlik ustamali stipendiyaning joriy qilinganligidir.
Ma’lumot: bugungi kunda umumiy stipendiya miqdori 569 668 so‘mni tashkil etadi. Oliy ta’lim muassasasida ta’lim olayotgan nogironligi bo‘lgan talabaga esa, 569 668 so‘mga 50 foizlik ustama qo‘shib to‘lanadi. Ya’ni, nogironligi bo‘lgan talaba har oy o‘rtacha 854 502 so‘m miqdorida stipendiya oladi.
Nogironligi bo‘lgan talaba stipendiyasiga 50 % lik ustama olish uchun kimga murojaat qilishi lozim?
Nogironligi bo‘lgan talaba 50 foizlik ustama qo‘shib to‘lanadigan stipendiya olishi uchun nogironlik to‘g‘risidagi hujjatni o‘zi ta’lim olayotgan oliy ta’lim muassasasi buxgalteriga taqdim etishi shart. Bunda oliy ta’lim muassasasi buxgalteri nomiga ariza bilan murojaat qilish talab etilmaydi. Nogironlik haqidagi hujjatni taqdim etish kifoya.
Nogironligi bo‘lgan talabalarga beriladigan 50 % lik ustamali stipendiya qaysi guruh nogironligi bo‘lgan talabalarga beriladi?
Ustamali stipendiya olish imtiyozi soha doirasidagi qonunchilik amaliyoti bo‘yicha faqat I va II guruh nogironligi bo‘lgan talabalargagina tatbiq etiladi. O‘zbekiston Respublikasi Vazirlar Mahkamasining 2020-yil 31-yanvardagi 59-son qarori bilan tasdiqlangan nizomda I va II guruh nogironligi bo‘lgan to‘lov-kontrakt asosida ta’lim oluvchi talabalarga stipendiya to‘lovlari O‘zbekiston Respublikasining respublika byudjeti mablag‘lari hisobidan amalga oshiriladi.
Avvalgi o‘quv semestri yakuni bo‘yicha fanlardan o‘zlashtirish ko‘rsatkichlaridan qat’i nazar I va II guruh nogironligi bo‘lgan talabalarga stipendiyaning bazaviy miqdoriga nisbatan 50 foiz oshirilgan miqdorlarda stipendiya tayinlanadi va to‘lanadi.
Semestr yakuni bo‘yicha fanlardan o‘zlashtirish ko‘rsatgichiga qaramasdan nogironligi bo‘lgan talabaga stipendiya to‘lash nima?
Nogironligi bo‘lgan talaba fanlarni o‘zlashtirish ko‘rsatkichlariga nisbatan belgilangan standartlarni bajara olmasa, o‘tilgan fanlar doirasida tashkil etilgan yakuniy nazorat ishlaridan muvaffaqiyatli o‘ta olmasdan ikkinchi semestrga qolib ketsa, nafaqat ustamali stipendiya balki, stipendiya olish huquqidan ham mahrum bo‘ladi.
Talabalarga stipendiya to‘lash tartibi borasidagi qonunchilikka ko‘ra, davlat granti asosida ta’lim olayotgan talaba fanlarni o‘zlashtirish darajasi belgilangan standartlarga javob bermasa, keyingi semestrdan o‘sha talaba stipendiya olish huquqidan foydalana olmaydi. Bu bevosita nogironligi bo‘lgan talabalarga ham taalluqli hisoblanadi. Talabalarning fanlarni o‘zlashtirish standarti deganda, “2” bahodan yuqori ball olish ko‘rsatkichi nazarda tutiladi. Ya’ni, nogironligi bo‘lgan talaba o‘tilgan fanlarni o‘zlashtirish darajasi 3 baho ko‘rsatkichida bo‘lsa ham qo‘shimcha ustamali stipendiya olish imkoniyatiga ega bo‘ladi.
Ikkinchi mutaxassislikka o‘qiyotgan nogironligi bo‘lgan talabalarga ham ustamali stipendiya beriladimi?
Ushbu imtiyoz ikkinchi mutaxassislikda o‘qiyotgan nogironligi bo‘lgan talabalar uchun ham taalluqlidir. Misol uchun nogironligi bo‘lgan shaxs Mirzo Ulug‘bek nomidagi O‘zbekiston milliy universitetini bitirgan. Ishga kira olmaganligi uchun ikkinchi mutaxassislik bo‘yicha Toshkent davlat pedagogika universitetiga o‘qishga kirdi. Mana shu holatda ham nogironligi bo‘lgan talabaga ustamali stipendiya beriladi. Biroq, nogironligi bo‘lgan talaba ikkinchi mutaxassislik bo‘yicha ta’lim olayotganligi uchun to‘lov kontrakti asosida o‘qiydi.
Nogironligi bo‘lgan talabalarni moddiy rag‘batlantirish bilan bog‘liq yana qanday imtiyozlar mavjud?
Nogironligi bo‘lgan talabalarni moddiy rag‘batlantirishda ham bir qator imtiyozlar qonunchilikda belgilangan. Ya’ni, har bir oliy ta’lim muassasasida talabalarni moddiy rag‘batlantirib borish bo‘yicha oliy ta’lim muassasasi qoshida “talabalarni rag‘batlantirish jamg‘armasi” tashkil etilgan. Mazkur jamg‘arma mablag‘laridan foydalanish, jamg‘arma mablag‘lari hisobiga talabalarni moddiy qo‘llab-quvvatlash, oliy ta’lim muassasasining kengashi tomonidan tasdiqlanadigan tartibga muvofiq amalga oshiriladi. Jamg‘arma mablag‘laridan davlat granti va to‘lov-kontrakt asosida ta’lim olayotgan talabalarga to‘lov qaysi shaklda (stipendiyali yoki stipendiyasiz) amalga oshirilishidan qat’i nazar, belgilangan mezonlar asosida rag‘batlantirish to‘lovlari tayinlanadi. Oliy ta’lim muassasalarida to‘lov-kontrakt asosida ta’lim olayotgan (stipendiyali yoki stipendiyasiz shaklda ekanligidan qat’i nazar), o‘quv semestri yakuni bo‘yicha fanlardan o‘zlashtirish ko‘rsatkichlari “a’lo” baho (reyting ko‘rsatkichi 86 ball va undan yuqori) bo‘lgan talabalar stipendiyaning bazaviy hisoblash miqdoriga nisbatan 20 foiz miqdorida Jamg‘arma hisobidan rag‘batlantiriladi.
Masalan, nogironligi bo‘lgan talaba Jahon tillar universitetida ikkinchi mutaxassislik bo‘yicha to‘lov-kontrakt asosida ta’lim oladi. Nogironligi bo‘lgan talaba semestrni hamma fanlar bo‘yicha a’lo baholar bilan tugatdi. Mana shu holatda, nogironligi bo‘lgan talaba umumiy stipendiya miqdoriga nisbatan moddiy yordam sifatida 20 foiz qo‘shimcha pul olishi mumkin.
Ma’lumot: Bugungi kunda stipendiya miqdori 569 668 so‘m deb oladigan bo‘lsak, fanlarni o‘zlashtirish darajasi yuqorida keltirilgan talablarga to‘g‘ri keladigan talabaga moddiy yordam sifatida umumiy stipendiya summasiga nisbatan 20 foizli moddiy yordam puli ajratiladi. Nogironligi bo‘lgan talaba umumiy stipendiya miqdorining 20 foiziga teng keladigan moddiy yordam pulini olishi uchun o‘tilgan fanlar imtihonlaridan a’lo darajali o‘tib, semestrni ijobiy yakunlagan bo‘lishi shart.
Oliy ta’lim muassasalari qoshida tashkil etilgan “talabalarni rag‘batlantirish jamg‘armasi” tomonidan stipendiyaning asosiy miqdoriga nisbatan 50 foizlik qo‘shimcha moddiy yordam belgilanishi mumkin. 50 foizlik moddiy yordamga ega bo‘lishi uchun nogironligi bo‘lgan talaba alohida bir qobiliyatini ta’lim jarayonlarida namoyon qilishi talab etiladi.
Masalan: innovatsion g‘oyalarga asoslangan loyihalarni ishlab chiqqan bo‘lishi yoki jamiyat uchun foyda keltiradigan qurilmalar, ilovalarni ommaga taqdim etgan bo‘lishi kerak. Ya’ni, “Kitobplus” ilovasi yoki “O‘zbekcha nutq sintezatori” kabi loyihalarni muvaffaqiyatli amalga oshirgan bo‘lishi kerak.
Jamg‘arma hisobidan beriladigan moddiy yordam bir marotabalik xususiyatga ega bo‘lib, nogironligi bo‘lgan shaxslar stipendiyasiga qo‘shiladigan ustamadan tashqari belgilanadigan summa hisoblanadi. Bu turdagi moddiy yordamni olish uchun talaba “talabalarni rag‘batlantirish jamg‘arma”si rahbari nomiga ariza bilan murojaat qilishi talab etiladi. (Ariza namunasi 1-ilovada).
Nogironligi bo‘lgan talabalar uchun yotoqxonalariga joylashishda imtiyozlar mavjudmi?
2024/2025 o‘quv yilidan boshlab barcha kurs talabalari uchun davlat oliy ta’lim muassasalari talabalar turar joyiga joylashish onlayn shaklda amalga oshiriladi. Bunda talabalar turar joyiga joylashish uchun ariza berish 1-avgustdan boshlab o‘quv yili yakuniga qadar davom etadi
quyidagi toifadagi talabalar ustuvorlik asosida talabalar turar joylariga qabul qilinadi:
- “Mehribonlik uylari” tarbiyalanuvchilari, yetim va ota-ona qaramog‘idan mahrum bo‘lgan talabalar;
- “Ijtimoiy himoya yagona reyestri”, “Temir daftar” va “Ayollar daftari”ga kiritilgan ijtimoiy himoyaga muhtoj oilalarning farzandlari hamda “Yoshlar daftari”da turadigan talabalar;
- I va II guruh nogironligi bo‘lgan talabalar
Nogironligi bo‘lgan talabalarni yotoqxona bilan ta’minlash tartibi qanday?
Nogironligi bo‘lgan talabalar talabalar turar-joylari bilan ta’minlanishdagi imtiyozli shaxslar sanalishadi. Talabalar turarjoylari bilan ta’minlashda ularning holatlari birinchi navbatda inobatga olinadi. Nogironligi bo‘lgan talabalarning talabalar turarjoylariga joylashishlari va undan foydalanishdagi to‘lovlarda ham o‘ziga xos imtiyozlar qonunchilikda nazarda tutilgan. Bu masala Oliy ta’lim muassasalari talabalar turar joyida yashashning umumiy qoidalari Vazirlar Mahkamasining 2023-yil 14-avgustdagi 376-son qarori bilan tasdiqlangan ma’muriy reglament asosida amalga oshiriladi.
Bugungi kunda talabalar turarjoyida yashash umumiy to‘lovi – 250 ming so‘mni tashkil etadi. I guruh nogironligi bo‘lgan talabalar talabalar turarjoylarida davlat hisobidan bepul turishadi. II guruh nogironligi bo‘lgan talabalar talabalar turargohida yashash uchun belgilangan umumiy to‘lovning 50 foiz miqdorida to‘lovni amalga oshirishadi. Bu bugungi kunda 125 ming so‘mni tashkil etadi.
Ilova:
Foydalanilgan manbalar:
- O‘zbekiston Respublikasi Vazirlar Mahkamasining 2020-yil 31-yanvardagi 59-son qarori bilan tasdiqlangan “Oliy ta’lim muassasalari talabalariga stipendiyalar tayinlash va to‘lash tartibi to‘g‘risida”gi nizom;
- Vazirlar Mahkamasining 2023-yil 14-avgustdagi 376-son qarori bilan tasdiqlangan “Davlat oliy ta’lim muassasalarining talabalarini talabalar turar joyiga joylashtirish bo‘yicha davlat xizmatlari ko‘rsatishning ma’muriy reglamenti”
Bu maqolada sen nogironligi bor talabalarning o‘qish paytidagi imtiyozlari haqida bilib olasan.
Talaba – bu universitetda o‘qiydigan inson.
Nogironligi bor talabalarga:
- stipendiya to‘lash
- yotoqxona bilan ta’minlash
- va boshqa qulayliklar yaratilgan
Nogironligi bor talabalarning stipendiyalariga 50 foiz stipendiya qo‘shib beriladi.
Barcha uchun stipendiya 517 880 (besh yuz o‘n yetti ming sakkiz yuz sakson) so‘m bo‘lsa, nogironligi bor talabaning stipendiyasi 776 820 (yetti yuz yetmish olti ming sakkiz yuz yigirma) so‘m bo‘ladi.
Sening stipendiyangga 50 foiz pul qo‘shilishi uchun:
- nogironlik hujjatingni va universitet hisobchisi nomiga ariza berishing kerak.
50 foizli qo‘shimcha stipendiya faqat birinchi va ikkinchi guruh nogironligi bor talabalarga beriladi.
Vazirlar Mahkamasining nizomiga ko‘ra:
- shartnomada o‘qiydigan birinchi va ikkinchi guruh nogironligi bor talabalarga stipendiyalar davlat hisobidan beriladi.
Birinchi va ikkinchi guruh nogironligi bor talabaning o‘zlashtirishi 3 bahodan past bo‘lmasa 50 foizli qo‘shimcha stipendiya beriladi.
Nogironligi bor talaba:
- fanlardan o‘zlashtirishi 3 bahodan past bo‘lsa
- yakuniy nazorat ishlaridan o‘ta olmasa
- ikkinchi semestrga qolib ketsa stipendiya ham, qo‘shimcha stipendiya ham berilmaydi.
Davlat grantida o‘qiydigan talabaning fanlarni o‘zlashtirishi 3 bahodan past bo‘lsa, keyingi semestrdan stipendiya berilmaydi.
Ikkinchi mutaxassislikda o‘qiyotgan nogironligi bor talaba ham qo‘shimcha stipendiya olishi mumkin.
Masalan:
- Sen Mirzo Ulug‘bek nomidagi O‘zbekiston milliy universitetini bitirgansan.
- Ishga kira olmaganing uchun ikkinchi mutaxassislik bo‘yicha Toshkent davlat pedagogika universitetiga o‘qishga kirding.
- Bu holatda senga shartnomada o‘qisang ham qo‘shimcha stipendiya beriladi.
Har bir universitetda talabalarga rag‘batlantirish pullari berish bo‘yicha “talabalarni rag‘batlantirish jamg‘armasi” tashkil etilgan.
“Talabalarni rag‘batlantirish jamg‘armasi” pullaridan foydalanish va talabalarni qo‘llab-quvvatlash tartibini universitet kengashi tasdiqlaydi.
Talaba davlat granti yoki shartnomada o‘qisa ham jamg‘arma hisobidan rag‘batlantirish beriladi.
To‘lov-shartnoma asosida o‘qiydigan va fanlardan yakuniy imtihonlardan “5” baho olgan talabalarning stipendiyasiga 20 foizli qo‘shimcha stipendiya beriladi.
Masalan:
- Sen Jahon tillar universitetida ikkinchi mutaxassislik shartnomada o‘qiysan.
- Sen semestrni hamma fanlarini 5 bahoga tugatding.
- Sening stipendiyangga 20 foiz qo‘shimcha pul qo‘shib beriladi.
Jamg‘arma 50 foizlik qo‘shimcha stipendiya ham berishi mumkin.
50 foizlik stipendiyani olish uchun sen:
- jamiyat uchun foyda keltiradigan qurilmalar,
- ilovalarni ishlab chiqqan bo‘lishing
- Ya’ni, “Kitobplus” ilovasi
- yoki “O‘zbekcha nutq sintezatori” kabi loyihalar qilgan bo‘lishing kerak.
Jamg‘arma hisobidan beriladigan qo‘shimcha stipendiya faqat bir marta beriladi.
Jamg‘arma hisobidan beriladigan qo‘shimcha stipendiya senga beriladigan 776 (yetti yuz yetmish olti) ming stipendiyadan tashqari beriladigan pul hisoblanadi.
Qo‘shimcha stipendiya olish uchun sen “Talabalarni rag‘batlantirish jamg‘armasi” rahbariga ariza bilan murojaat qilishing kerak.
Nogironligi bor talabalarni yashash joyi bilan ta’minlanishda ham imtiyoz bor.
Seni yotoqxonaga joylashish va yotoqxona to‘lovlarida imtiyozlaring bor.
Hozirda barcha uchun yotoqxona talabalar to‘lovi – 250 000 (ikki yuz ellik ming) so‘m.
Birinchi guruh nogironligi bor talabalar yotoqxona uchun to‘lov to‘lamaydilar.
Ikkinchi guruh nogironligi bor talabalar yotoqxona uchun 50 foiz to‘lov to‘lashadi.
To‘lovning 50 foizi hozirda 125 (bir yuz yigirma besh ming) so‘m.
Sirtqi ta‘limda davlat grandi asosida tahsil olayotgan talabalarga stipendiya beriladimi?
Assalomu alaykum.
Stipendiya faqat kunduzgi ta’limda o‘qiyotgan davlat granti yoki stipendiyali to‘lov-kontraktda o‘qiyotgan talablarga beriladi.
4. guruh nogironligi bo‘lgan talabalar yotoqhonaga qancha foiz miqdorida to‘lovni amalga oshirishadi.
Assalomu alaykum
18 yoshga to‘lmagan, lekin nogironligi bor shaxslar 4-guruh nogironi deb e’tirof etilishadi. Shu ma’noda, ularning guruh nogironliklari aniqlangunga qadar, talabalar turarjoylari uchun 50 foizlik to‘lovni amalga oshirishadi. Ma’lumot o‘rnida, bugungi kunda talabalar turarjoylari uchun to‘lovlar 250000 so‘mni tashkil etsa, 4-guruh nogironi deb e’tirof etilgan shaxslar mana shu summaning yarmini, ya’ni, 125000 so‘m to‘lashadi.
Assalomu aleykum, dtmdan keyin ballarni elon qiladigan kuni, ozimizning ballar chiqadimi avval yoki srazu qoshib berishadimi
Assalomu alaykum
Magistraturaga kirishda ballar eng yuqori ko‘rsatkichdan boshlab hisoblanib, shunga qarab kvotalar ajratiladi. Alohida qo‘shimcha bal taqdim etilmaydi. Bu yerda asosan, bakalavr bosqichida to‘plagan ballaringiz katta rol o‘ynaydi. Misol uchun magistratura uchun 3 ta kvota berilgan bo‘lib, da’vogarlar soni 5 ta. Mana shu holatda, bakalavr bosqichida to‘plagan ballari bo‘yicha eng yuqori ko‘rsatkichlarga ega shaxslar kvotalarga egalik qilishadi. Bu bo‘yicha saytimizda maxsus maqola nashr etilgan. Shu maqolani ham o‘qib ko‘rishingizni tavsiya qilardim. Salomat bo‘ling.
Manda bronx astma kasalligi bor nogironlik guruhim II o’qishga kirishda necha foizlik ligotalari bor shu haqida ma’lumot bersangiz
Assalomu alaykum
Agarki siz bakalavr bosqichiga o‘qishga kirishni nazarda tutayotgan bo‘lsangiz, o‘qishga kirish uchun nogironligi bo‘lgan shaxslar doirasida 2 foizlik qo‘shimcha kvota belgilangan.
Men ikkinchi guruh nogironligim bor men oqishga kirishimda yetarli balni toplolmasam menga qanday yordam imtiyoz beriladi
Bunday holatda hech qanday imtiyoz berilmaydi.
Yana qanday imtiyoz bo‘lishi mumkin?
Keyingi yil yaxshiroq tayyorlaning, omad.
Assalomu aleykum kechki ta’limda o’qiyotgan nogironligi bor talabalarga ham yotoqxona beriladimi
Kechki ta’limda o‘qiyotgan talabalarga odatda, talabalar turar joyidan joy ajratilmaydi. Agarki, talaba nogironligi bo‘lgan shaxs maqomida bo‘lsa, bu toifa shaxsga talabalar turar joyidan joy ajratib berilishi shart.
Assalomu alaykum Nogironligi bor shaxslarga magistraturaga kirish uchun qandaydir imtiyoz mavjudmi?
Yana bir savol: 2024 yil sentabr oyidan talabalarning o‘qishiga qarab stipendiya joriy etiladi ya’ni kontraktdagilar grandga, grantdagilar kantrakka o’tib qolishi mumkin ekan. Bu qaror imtiyozli talabalarga ham taalluqlimi?
Nogironligi bo‘lgan shaxslarning magistraturaga kirishdagi imtiyozlari haqida maqolamiz chop etilgan. Quyidagi havola orqali batafsil o‘qing:
https://huquqplus.uz/materials/talim/1810
Yana bir savol: 2024 yil sentabr oyidan talabalarning o‘qishiga qarab stipendiya joriy etiladi ya’ni kontraktdagilar grandga, grantdagilar kantrakka o’tib qolishi mumkin ekan. Bu qaror imtiyozli talabalarga ham taalluqlimi?
Ushbu tartib barcha talabalarga, shu jumladan imtiyozli talabalarga ham tatbiq qilinadi.
Nogironligi bo‘lgan talabalarga magistraturaga kirish uchun imtiyozlar mavjudmi
Nogironligi borda lekin uni qo‘llashni billmaydi. Agar o‘qishga kontrakt bo‘lib kirsa uning imtiyozlarini qanday qo‘llaydi?
Qanday imtiyozlarni nazarda tutmoqdasiz? Agar o‘qishga kirishda beriladigan imtiyozlarni nazarda tutayotgan bo‘lsangiz, bundan foydalana olmaydi.
Ammo boshqa imtiyozlaridan foydalanishi mumkin.
Assalomu alaykum. Ta’lim sohasida nogironligi bo‘lgan shaxslar uchun yaratib berilgan imtiyozlardan foydalanish uchun birinchi navbatda, fakultet dekanatiga murojaat qilish kerak bo‘ladi. Imtiyozlar inobatga olinmasa, o‘quv ishlari bo‘yicha prorektorga murojaat qilish mumkin.