Nogironligi bor shaxslar bolalarini bog‘chaga berishdagi imtiyozlari bo‘yicha savol-javoblar
- Matnli format
- Video format
- Oson matn
Mening nogironligim bor, bolamni bog‘chaga bermoqchiman qancha miqdorda to‘lov to‘layman?
Farzandingiz bog‘chaga davlat hisobidan imtiyozli asosda qatnashi mumkin. O‘zbekiston Respublikasi Xalq ta’limi hamda Moliya vazirligining 2016 yil 23-avgustdagi 2821-sonli qaroriga asosan qabul qilingan “Maktabgacha ta’lim muassasalari va maktab-internatlaridagi bolalar ta’minotiga haq to‘lash tartibi to‘g‘risida” gi Nizom qabul qilingan.
Unga ko‘ra ota-onalaridan biri yoki ikkalasi ham nogironligi bo‘lgan shaxs sifatida qayd etilgan bo‘lsa, mavjud qonunchilik talablariga ko‘ra ularning farzandlariga bog‘chaga davlat hisobidan borishlik uchun imtiyoz qo‘llaniladi.
Mening o‘zimda nogironlik yo‘q, lekin bolamdan nogironlik bor, bolam uchun bog‘chaga pul to‘laymanmi?
Bolalarning jismoniy yoki aqliy rivojlanishidagi quyidagi nuqsonlarida maktabgacha ta’lim muassasalarida bolalar ta’minoti uchun ota-onalardan to‘lov undirilmaydi:
- nutqidagi og‘ir nuqsonlar (rinologiya, duduqlanish, bolalar afaziyasi, ruhiy-nutqiy rivojlanishda orqada qolish);
- eshitishdagi og‘ir nuqsonlar (II — IV darajadagi karlik);
- ko‘rishdagi og‘ir nuqsonlar (ko‘zi ojizlar, bir ko‘zi soqqasi yo‘qligi (anoftalm), ambliopiya va g‘ilay bo‘lgan zaif ko‘radiganlar);
- tayanch-harakatlanishidagi nuqsonlar (bosh miya, bo‘yin, ko‘krak qafasi, umurtqa, bo‘g‘imlar va oyoqlar operatsiyalarining barcha turlaridan keyingi holati; bo‘yin, ko‘krak qafasi, umurtqaning idiapatik deformasiyalari; kifoz; lordoz; kifoskolioz; oyoq panjalari falaji; tayanch-harakatlanish a’zosi rivojlanishi anomaliyalari; artrozoartritlar; ostexondropatiya; xondrodistrofiya; bolalar serebral falaji; meningoensefalitga chalingandan keyin hamda tug‘uruq asoratlaridan keyingi tayanch-harakatlanish a’zolarining barcha patologiyalari va hakazo.
Bolamni bog‘chaga joylashtirmoqchi edim, bog‘cha uchun navbatda menga imtiyoz beriladimi?
Barcha shaxslar farzandlarini maktabgacha ta’lim muassasasiga joylash uchun davlat xizmatlari markazida ya’ni yagona darchada navbatda turadi. I, II guruh nogironligi bo‘lgan shaxslarning farzandlari maktabgacha ta’lim muassasalariga joylashish uchun imtiyozli navbatga turish imkoniyatiga egadirlar.
Bolalarni maktabgacha ta’lim muassasaga imtiyozli joylashtirish uchun ariza topshirish tartibi qanday?
Bunda, nogironligi bo‘lgan ota-ona o‘z farzandini maktabgacha ta’lim muassasiga joylashtirish uchun anketa to‘ldiradi. Anketani quyidagi ikki xil usulda to‘ldirish mumkin:
- Ota-onalar yoki ularning o‘rnini bosuvchi shaxslar tomonidan Davlat xizmatlari markaziga borib murojaat qilish orqali;
- Yagona interaktiv davlat xizmatlari portalida tegishli anketani onlayn to‘ldirish orqali.
Onlayn ariza topshirish tartibi quyidagilardan iborat:
- www.my.gov.uz vebsaytiga kirib, ro‘yxatdan o‘tishingiz kerak bo‘ladi. Ro‘yxatdan o‘tish shaxsiy telefon raqamingiz, shaxsingizni tasdiqlaydigan hujjat (pasport yoki ID karta) ma’lumotlarini ushbu saytga kiritish orqali amalga oshiriladi.
- Keyin o‘zingiz yashaydigan hududingiz nomini va farzandingizni joylashtirmoqchi bo‘lgan maktabgacha ta’lim muassasasi raqamini kiritishingiz talab etiladi.
- Yuqoridagilarni amalga oshirganingizdan keyin farzandingizni tug‘ilganligi haqidagi guvohnomada (metrika) yozilgan ma’lumotlarni yozishingiz kerak. Bu yerda asosan, farzandingiz tug‘ilganligi haqidagi hujjat seriya raqami so‘raladi. Ushbu ishlarni amalga oshirganingizda boshqa kerakli ma’lumotlar elektron shaklda baza orqali aniqlanadi. Farzandingizni navbatga qo‘yish uchun ma’lumotlar bazasi to‘liq ekranda namoyon bo‘ladi. Ma’lumotlarning to‘g‘riligini tekshirib chiqib, tasdiqlashingiz kerak bo‘ladi. Tasdiqlashda sizni telefoningizga elektron kod xabarnomasi keladi. Telefoningizga kelgan kodni saytga kiritish orqali siz arizani onlayn shaklda yuborishingiz mumkin bo‘ladi.
Men bolamni bog‘chaga joylash uchun online ariza bergan edim, uning qay holatda turganini uydan turib aniqlasam bo‘ladimi?
Siz yuborgan arizangizning qay holatda turganligini aniqlashingiz uchun www.my.gov.uz vebsaytiga kirib, mening arizalarim bo‘limiga kirishingiz va ariza raqamingizni kiritishingiz kerak.
Men bolamni xususiy bog‘chaga bermoqchi edim, men ham tegishli imtiyozdan foydalansam bo‘ladimi?
Yo‘q, siz foydalana olmaysiz. Bu imtiyoz faqatgina davlat tasarrufida bo‘lgan maktabgacha ta’lim muassasalariga joriy etiladi.

«Nogironligi bo‘lgan shaxslar farzandlarini maktabgacha ta’lim muassasalarida o‘qitishda qanday imtiyozlar bor?» mavzusidagi huquqiy maqolamiz bilan tanishing.